आजका दैनिक पत्रपत्रिकाको फ्रन्टपेजः वैशाखभित्रै स्थानीय तहको निर्वाचन

९ माघ, काठमाडौं । आज काठमाडौंबाट प्रकाशित सबैजसो दैनिक पत्रिकाहरुले वैशाखसम्ममा स्थानीय तहको निर्वाचन गर्न तीन दल सहमत भएको समाचारलाई फ्रन्टपेजमा स्थान दिएका छन् ।

यसबाहेक, नयाँ पत्रिका दैनिकले एयरमार्सल राख्न चाहने अन्तर्राष्ट्रिय वायुसेवालाई बाटो खुला भएको र स्ववियु निर्वाचनका लागि विद्यार्थी संगठन तातेको तर त्रिभुवन विश्वविद्यालय सुस्त भएको समाचारलाई फ्रन्टपेजमा प्रकाशित गरेको छ

अन्नपूर्ण पोस्ट् दैनिकले संविधान संशोधनविरुद्ध एमाले अध्यक्ष केपी शर्मा ओली अडिग रहेको, माथिल्लो अरुण जलविद्युत आयोजना निर्माणलाई विश्व बैंकले अड्काएको र असन ढलमग्न भएको समाचारलाई महत्व दिएको छ ।

नागरिक दैनिकले सरकारले निर्वाचनभन्दा बजेटलाई बढी प्राथमिकता दिएको र महिलाको नेतृत्वमा रहेको दलसँगै महिलालाई धेरै चुनौती भएको समाचारलाई प्राथमिकता दिएको छ ।

कान्तिपुर दैनिकले टीकापुर घटना दलका नेताहरुको अभिव्यक्तिका कारण भएको अध्ययन प्रतिवेदन आएको र बालबालिकाको संख्या घट्दै गएको समाचारलाई महत्व दिएको छ ।

गोरखापत्र दैनिकले सम्पदा पुनर्निर्माण कछुवाको गतिमा भएको र स्वास्थ्य बिमा प्रभावकारी बन्दै गएको समाचारलाई फ्रन्टपेजमा प्रकाशित गरेको छ ।