दासढुंगा घटनाबारे अझै रहस्य कायम : बादल

जेठ ३, काठमाडौँ । नेकपा एमालेका उपाध्यक्ष रामबहादुर थापा ‘बादल’ ले दासढुंगा घटना सामान्य सडक दुर्घटना नभई देशी–विदेशी शक्तिसँग जोडिएको गम्भीर राजनीतिक षड्यन्त्र हुन सक्ने बताएका छन्। मदन–आश्रित स्मृति दिवसका अवसरमा बल्खुमा आयोजित कार्यक्रममा उनले उक्त घटनाको वास्तविकता आजसम्म रहस्यमै रहेको टिप्पणी गरे।

नेपालको राजनीतिक इतिहासमा शक्तिकेन्द्रका लागि चुनौती बनेका नेता वा राजनीतिक शक्तिलाई समाप्त पार्ने प्रवृत्ति दोहोरिँदै आएको दाबी गर्दै बादलले कोतपर्वदेखि दरबार हत्याकाण्डसम्मका घटनालाई उदाहरणका रूपमा प्रस्तुत गरे। उनले भदौ २३–२४ का घटनाक्रमलाई पनि दासढुंगा प्रकरणकै निरन्तरताका रूपमा व्याख्या गरे।

उनले एमाले नेतृत्वमा रहेको सरकार र संसद्लाई विघटन गर्ने उद्देश्यसहित षड्यन्त्र भएको आरोप लगाउँदै पार्टी कार्यालय, नेताका निजी निवास तथा देशभर हिंसात्मक गतिविधि गराइएको बताए। फागुन २१ पछिका राजनीतिक घटनाक्रम, अध्यादेश, मन्त्रिपरिषद्का निर्णय तथा एमाले अध्यक्षमाथि लगाइएका मुद्दालाई समेत उनले दासढुंगा घटनाकै निरन्तरता भएको दाबी गरे।

एमालेलाई समाप्त पार्ने योजनाबद्ध प्रयास भइरहेको आरोप लगाउँदै बादलले पार्टी र नेतृत्वको रक्षाका लागि “सतिसाल झैँ उभिने” सङ्कल्प गर्न कार्यकर्तालाई आग्रह गरे। साथै, जनताको बहुदलीय जनवाद (जबज) बारे फैलाइएका भ्रम चिर्न र त्यसको रक्षा तथा विकासका लागि दृढतापूर्वक लाग्नुपर्ने उनले बताएका छन्।