श्रममन्त्री साह बर्खास्त

चैत २६, काठमाडौं । प्रधानमन्त्री बालेन शाह ले श्रम, रोजगार तथा सामाजिक सुरक्षामन्त्री दीपककुमार साह लाई पदमुक्त गरेका छन्। प्रधानमन्त्री शाहले सम्बन्धित पार्टीको सिफारिसका आधारमा मन्त्री साहलाई बर्खास्त गरेका हुन्।

रवि लामिछाने ले मन्त्री साहले पदीय मर्यादाको दुरुपयोग गरेको आरोप लगाउँदै उनलाई फिर्ता बोलाउन प्रधानमन्त्रीसमक्ष पत्र पठाएका थिए। मन्त्री साहले आफ्नी पत्नी जुनु श्रेष्ठलाई स्वास्थ्य बीमा बोर्डको सदस्यमा पुनः नियुक्त गर्ने निर्णय गरेपछि विवाद चर्किएको थियो।उनको विगतसमेत विवादित रहेको भन्दै अन्ततः उनलाई पदमुक्त गरिएको हो। साह करिब १३ दिनअघि मात्र मन्त्रीमा नियुक्त भएका थिए।

यसैबीच, गम्भीर विषयमा अपेक्षित संवेदनशीलता नदेखाएको भन्दै रवि लामिछाने ले स्वास्थ्य तथा जनसंख्यामन्त्री निशा मेहतालाई सचेत गराउन प्रधानमन्त्रीसमक्ष सिफारिस गरेका थिए। सोही आधारमा प्रधानमन्त्री शाहले मन्त्री मेहतालाई सचेत गराइसकेको जनाइएको छ।