गौरी बहादुर कार्की नेतृत्वको आयोगले घटनाको छानबिनपछि तयार पारेको प्रतिवेदनमा आन्दोलनका क्रममा घाइते भएका २८ जना प्रदर्शनकारीको विस्तृत बयान समेटिएको छ। ती बयानहरूमा सुरक्षाकर्मीले बिना चेतावनी निहत्था नागरिकमाथि लक्षित गरी गोली प्रहार गरेको दाबी गरिएको छ।
प्रतिवेदनअनुसार, शान्तिपूर्ण रूपमा सुरु भएको आन्दोलनमा प्रहरीले एक्कासि अश्रुग्यास, रबर बुलेट तथा घातक धातुका गोली (लाइभ राउन्ड) प्रयोग गरेको घाइतेहरूले बताएका छन्। अधिकांश घाइतेले घुँडाभन्दा माथि, छाती, पेट, टाउको र आँखामा गोली लागेको उल्लेख गरेका छन्।
घाइतेमध्ये १७ वर्षीया एकता शाहले बानेश्वर क्षेत्रमा प्रदर्शन हेरिरहेको अवस्थामा दायाँ घुँडामा रबर बुलेट लागेर गम्भीर घाइते भएको बयान दिएकी छन्। त्यस्तै, कुमार उपाध्यायले घरको छतमा उभिएर हेर्दै गर्दा लागेको गोली पाखुरा हुँदै फोक्सो र ढाडसम्म पुगेको बताएका छन्। अर्का घाइते राम चर्माकारले कलंकी क्षेत्रमा करिब १५–२० मिटर दूरीबाट बिना चेतावनी चलाइएको गोली सिधै आँखामा लागेको बताएका छन्।
गीता कुमारी शाहको घटना भने फरक प्रकृतिको रहेको प्रतिवेदनमा उल्लेख छ। भदौ २४ गते कोटेश्वरमा आन्दोलनकारीको भेषमा आएका उग्र समूहले एक प्रहरी हवल्दारमाथि आक्रमण गर्न खोज्दा उनलाई बचाउन प्रयास गर्ने क्रममा गीतामाथि पेट्रोलजस्तो पदार्थ छर्केर आगजनी गरिएको थियो। उक्त घटनामा उनको शरीरको करिब ४० प्रतिशत भाग जलेको र उनी अझै गम्भीर अवस्थामा रहेको उल्लेख छ।
आयुष वि.क., लोकराज उपाध्याय, सुरेन्द्रजंग थापा, स्मृति राईलगायत घाइतेहरूले संयुक्त रूपमा दिएको बयानमा भदौ २३ गतेको आन्दोलन स्वतःस्फूर्त र शान्तिपूर्ण रहेको, तर २४ गते बाहिरी घुसपैठपछि तोडफोड भएको र त्यसैलाई आधार बनाएर निर्दोष युवामाथि गोली चलाइएको दाबी गरिएको छ।
प्रतिवेदनअनुसार दुई दिनको आन्दोलनमा कुल २ हजार ५२२ जना घाइते भएका छन्। तीमध्ये १ हजार ३२८ जना प्रदर्शनकारी र २ हजार ६८ जना सुरक्षाकर्मी घाइते भएका उल्लेख छ। काठमाडौँ उपत्यकामा सबैभन्दा बढी घाइते भएको जनाइएको छ।
आयोगले भिड नियन्त्रणका नाममा सुरक्षाकर्मीले अन्धाधुन्ध रूपमा गोली र रबर बुलेट प्रयोग गर्दा ठूलो मानवीय क्षति भएको निष्कर्ष निकालेको छ।
