निर्वाचन आयोगद्वारा ‘निर्वाचन आचारसंहिता–२०८२’ स्वीकृत, माघ पहिलो सातादेखि कार्यान्वयनमा

काठमाडौँ, पुस १३ । निर्वाचन आयोगले आगामी फागुन २१ गते तोकिएको प्रतिनिधिसभा सदस्य निर्वाचनका लागि ‘निर्वाचन आचारसंहिता–२०८२’ स्वीकृत गरेको छ। आयोगको आइतबार सम्पन्न बैठकले आचारसंहिता अनुमोदन गरेको हो।

स्वीकृत आचारसंहिता माघ महिनाको पहिलो सातादेखि लागू हुने आयोगका कार्यवाहक प्रमुख निर्वाचन आयुक्त रामप्रसाद भण्डारीले जानकारी दिए।

यसअघि आयोगले आचारसंहिता–२०८२ को मस्यौदा सार्वजनिक गरी सरोकारवाला निकायहरूबाट सुझाव माग गरेको थियो। प्राप्त सुझावहरूलाई समेटेर आचारसंहितालाई अन्तिम रूप दिइएको आयुक्त भण्डारीले बताए।

आयोगका अनुसार यसपटक आचारसंहिताको दायरा अघिल्ला निर्वाचनको तुलनामा थप व्यापक बनाइएको छ। पहिले मुख्यतः सचेतनामुखी रहेको आचारसंहिता यसपटक कार्यान्वयन तथा कारबाहीमुखी बनाइएको पनि उनले स्पष्ट पारे।

तत्काल आचारसंहिता लागू गर्दा सरकारका नियमित कामकारबाही प्रभावित हुन सक्ने भएकाले त्यसलाई मध्यनजर गर्दै माघ पहिलो सातादेखि कार्यान्वयन गर्ने निर्णय गरिएको आयोगले जनाएको छ।