कुलमान घिसिङद्वारा सय दिनका १०१ काम सार्वजनिक (पूर्णपाठ)

२०८२ पुस ९, काठमाडौं । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले पदभार सम्हालेको एक सय दिनको उपलब्धि, प्रगति विवरण तथा आगामी कार्ययोजना सार्वजनिक गरेका छन्।

मन्त्रालयमा आज आयोजित कार्यक्रममा मन्त्री घिसिङले आफ्नो प्रत्यक्ष निर्देशन र सक्रिय नेतृत्वमा भएका १०१ वटा कामको विवरण प्रस्तुत गरेका हुन्। यस क्रममा जल तथा मौसम विज्ञान विभागमार्फत मौसम तथा बाढीसम्बन्धी विशेष बुलेटिन जारी गरी जोखिम पूर्वानुमान सूचना समयमै र प्रभावकारी रूपमा सम्प्रेषण गरिएको उल्लेख गरिएको छ।

मन्त्री घिसिङ जेन–जी आन्दोलनपछि गठन भएको सरकारमा ऊर्जा, जलस्रोत तथा सिँचाइ, भौतिक पूर्वाधार तथा यातायात तथा शहरी विकास मन्त्रालयको जिम्मेवारी सम्हाल्दै आएका छन्।

उनले एक सय दिनका प्रमुख उपलब्धिहरूमा बञ्चरेडाँडामा फोहोर विसर्जन अवरुद्ध हुँदा राजधानी काठमाडौं अस्तव्यस्त हुने समस्या समाधान, मेलम्ची खानेपानी काठमाडौं ल्याउन देखिएका अवरोध हटाउने, तातोपानी–कोदारी सडक खुलाएर उत्तरी छिमेकी चीनसँगको नाका पुनः सञ्चालन तथा मनसुनका कारण क्षतिग्रस्त बीपी राजमार्गलाई समयमै अस्थायी रूपमा सञ्चालनमा ल्याई जनजीवन सहज बनाएको विषय समेटिएका छन्।