सुशीला कार्की नेतृत्वको सरकार खारेज गरी सर्वपक्षीय अन्तरिम सरकार गठन गर्नुपर्छ : विप्लव

कात्तिक २, काठमाडौं  ।  नेकपाका महासचिव नेत्रविक्रम चन्द ‘विप्लव’ले हालको सुशीला कार्की नेतृत्वको अन्तरिम सरकार खारेज गरी सर्वपक्षीय अन्तरिम सरकार गठन गर्नुपर्ने माग गरेका छन्।

शनिबार राजधानीमा आयोजित पत्रकार सम्मेलनमा उनले हालै सम्पन्न केन्द्रीय समिति बैठकको निर्णय सार्वजनिक गर्दै जेनजी विद्रोहले आफ्नो राजनीतिक उद्देश्य हासिल गर्न नसकेको बताए।

विप्लवले भने, “आन्दोलनको मर्म र उद्देश्य पूरा हुने खालको भएको छैन। अहिले फेरि नयाँ षड्यन्त्रहरू देखिँदै छन्। अन्तरिम सरकार जेनजी आन्दोलनको मागअनुरूप बनेको छैन, बरु रहस्यमय ढंगले गठन गरिएको छ।”

उनका अनुसार हालको सरकार गठनमा कुनै पनि राजनीतिक दलको वास्तविक समर्थन छैन। “यो सरकारलाई आफ्नो पक्षमा भएको भनी देखाइएको भए पनि कसैले समर्थन गरेको छैन,” उनले भने।

विप्लवले मन्त्रीहरू पनि जेनजी आन्दोलनको भावना विपरीत चयन भएको आरोप लगाउँदै हालको सरकारलाई खारेज गरी सबै पक्षको सहभागितामा नयाँ अन्तरिम सरकार गठन गर्नुपर्ने माग दोहोर्याए।