सुरक्षा चुनौती सामना गर्दै नागरिक सुरक्षाको जिम्मेवारी पूरा गर्नुको विकल्प छैन : प्रहरी महानिरीक्षक खापुङ

काठमाडौँ, असोज ३१ गते। नेपाल प्रहरीका महानिरीक्षक (आईजीपी) चन्द्र कुबेर खापुङले हालको चुनौतीपूर्ण परिस्थितिमा पनि नागरिक सुरक्षाको जिम्मेवारी पूरा गर्नु नेपाल प्रहरीका सबै सदस्यको पहिलो कर्तव्य भएको बताएका छन्।

७०औँ प्रहरी दिवस २०८२ को अवसरमा शुक्रबार शुभकामना सन्देश जारी गर्दै आईजीपी खापुङले जेन–जी आन्दोलनपछि उत्पन्न सुरक्षा चुनौतीहरूलाई दृढतापूर्वक सामना गर्न प्रहरी बललाई आह्वान गरे।

उनले भने, “भदौ २३ र २४ गते भएका अप्रिय घटनापछि उत्पन्न कठिन परिस्थितिमा सुरक्षा चुनौतीको डटेर सामना गर्दै नागरिक सुरक्षाको गहन जिम्मेवारी पूरा गर्नुको विकल्प हामीसँग छैन। कुनै घटनाक्रमबाट हतोत्साहित नभई देश र नागरिकप्रतिको उत्तरदायित्व पूरा गर्न तथा तमाम अभाव र कठिनाइका बाबजुद नेपाल प्रहरीको उपस्थिति सशक्त बनाउन सबै प्रहरी कर्मचारीलाई निर्देशित गर्दछु।”

प्रहरी ऐन २०१२ जारी भएपछि नेपाल प्रहरीको विधिवत् स्थापना भएको स्मरण गर्दै उनले प्रहरी दिवसको ७०औँ वार्षिकोत्सवका अवसरमा वीर सहिदहरूप्रति श्रद्धाञ्जली अर्पण गरे।

जेन–जी आन्दोलनका क्रममा तोडफोड र आगजनीबाट क्षतिग्रस्त भएका प्रहरीका संरचनाहरू पुनर्निर्माणमा जनसहभागिताप्रति कृतज्ञता व्यक्त गर्दै उनले भने, “सो घटनाक्रमपछि क्षतिग्रस्त संरचनाहरूको पुनर्निर्माणमा आम नागरिकले देखाएको सहयोग र सहअस्तित्वका लागि म हार्दिक आभार व्यक्त गर्दछु।”