काठमाडौं । धादिङको थाँक्रे गाउँपालिका ७ स्थित सातकिल्लामा सर्वोच्च अदालतको अन्तरिम आदेशलाई अवहेलना हुने गरि गैरकानुनी खानी उत्खनन् शुरु भएको छ । श्री कुमारी माता रोडा ढुंगा उद्योगले गैरकानुनी रुपमा सर्वसाधरणको निजि जग्गा र सार्वजनिक जग्गामा उत्खनन् गरेपछि पीडितहरुले सर्वोच्च अदालतमा अन्तरिम आदेश माग गर्दै रिट दर्ता गराएका थिए । सर्वोच्च अदालतले पीडितको माग अनुसार अन्तरिम आदेश जारी गर्दै मुद्दाको अन्तिम किनारा नलागेसम्म उत्खनन् कार्य नगर्न आदेश दिएको थियो । तर, सर्वोच्च अन्तरिम आदेशलाई लत्याउँदै फेरी गैरकानुनी रुपमा उत्खनन् कार्य शुरु भएको हो ।
हाल प्रधानन्यायाधीश समेत रहेका प्रकाशमान सिंह राउत र न्यायधीश तिलप्रसाद श्रेष्ठको संयुक्त ईजलाशले गत साउन १४ गते अन्तरिम आदेशलाई निरन्तरता दिँदै अन्तरिम आदेश नभए बस्ती नै जोखिममा पर्ने देखिएको र त्यसले अपुरणीय क्षति हुने भन्दै अन्तरिम आदेशलाई निरन्तरता दिएको थियो ।
स्थानिय कृष्ण बहादुर प्रजासहित दर्जनौँ व्यक्तिहरुले सर्वोच्च अदालतमा श्रीकुमारी माता रोडा ढुंगा उद्योगले गैरकानुनी रुपमा उत्खनन् गरेको भन्दै रिट निवेदन दिएका थिए । उनीहरुको निवेदनमा सुुनुवाई गर्दै सर्वोच्च अदालतले २०८० असार ३ गते आईई गरेर मात्रै खानी संचालन गर्ने नगर्ने विषयमा निर्णय गर्न खानी विभागलाई निर्देशनात्मक अन्तरिम आदेश दिएको यिो । उद्योगले आईईका क्रममा स्थानियको रायलाई नै झुक्याएर गाउँपालिकाबाट खानी संचालन गराउन सफल भएका थिए । तर, पीडितहरुले पुन सर्वोच्च अदालतमा रिट निवेदकको रायलाई उल्लेख नगरी आईई प्रतिवेदन तयार पारिएको र गाउँपालिकाले समेत बदमासी रहेको भन्दै पुन निवेदन दिएका थिए । सर्वोच्च अदालतले उक्त खानी तत्काल संचालन नगर्न तीन पटकसम्म आदेश जारी गरेको छ ।
२ रोपनी खेत खसालेर खोलामा पारिएको छ : पीडित थापा
पीडित लक्ष्मण थापाका अनुसार अहिले कुमारी माता रोडा ढुंगा उद्योगले गैरकानुनी रुपमा सर्वोच्चको अन्तरिम आदेश पछि पनि खोला नै सारेका छन् । ‘मेरो २ रोपनी खेत नै खसालिएको छ । मेरो जग्गामा अहिले खोला बगिरहेको छ । पहिले खोला थिएन,’ थापाले भने,‘उनीहरुले मेरो जग्गबाट अबैध रुपमा ढुंगा लिएर गएका छन् । यो देशमा सर्वोच्च अदालतको आदेश समेत कार्यान्वयन भएन । म कसलाई भनौँ । कहाँ निवेदन दिउँ ?’
