मङ्सिर ३ ,अहमदाबाद। रोहित शर्माको कप्तानी र विराट कोहलीको प्रेरणामा भारतले आइतबार पाँच पटकको विश्वविजेता अस्ट्रेलियाविरुद्ध विश्वकप क्रिकेट प्रतियोगितामा उपाधि भिडन्त गर्दा एक अर्ब ४० करोड भारतीयहरुको मुटुको धड्कन पटकपटक तेज हुनेछ ।
विश्वकप क्रिकेटको फाइनल अहमदाबादस्थित नरेन्द्र मोदी रङगशालामा हुनेछ । जहाँको दर्शक क्षमता १३२००० रहेको छ । विश्वकपको फाइनलमा कीर्तिमान दर्शकको उपस्थिति हुने पक्का छ ।
भारत तेस्रो पटक विश्व विजेता बन्ने दाउमा छ । यद्यपि सन् २०११ पछि भारत विश्व च्याम्पियन बन्न सकेको छैन । यसपालि भारतको अगाडि चालू प्रतियोगिताको अर्को उत्कृष्ट टोली स्ट्रेलिया अन्तिम बाधाको रुपमा तेर्सिएको छ । छ हप्ता लामो प्रतियोगितामा घरेलु टिम भारत मात्र अपराजित टिम हो । अस्ट्रेलियाले भने सुरुका दुई खेल हारेपछि त्यसपछि लगातार आठ खेल जितेर फाइनलमा स्थान बनाएको हो ।
त्यसैले विश्वकप फाइनल जित्न भारतलाई कोहलीको अर्को उत्कृष्ट पालिको आवश्यकता हुनेछ । चालू प्रतियोगितामा भारतको सफलतामा कोहलीको सबभन्दा ठूलो भूमिका रहेको छ ।
यस प्रतियोगितामा कोहलीले दस पालिमा १०१.५७ रनको औसतले ७११ रन बनाइसक्नुभएको छ । कप्तान रोहितको ब्याट्बाट पनि ५५० रन बनिसकेको छ । तेज गतिमा ब्याटिङ गरेर भारतलाई विस्फोटक सुरुआत दिलाइरहनु भएका रोहितले चालू विश्वकपमा सर्वाधिक २८ छक्का प्रहार गर्नुभएको छ ।
अस्ट्रेलियाका प्रारम्भिक ब्याट्सम्यान डेभिड वार्नर पनि ५२८ रनसहित उत्कृष्ट लयमा हुनुहुन्छ । नौ खेलमा ४२६ रन बनाउने मिचेल मार्श तथा अफगानिस्तानविरुद्ध चमत्कारीक दोहोरो शतकीय पालि खेल्ने ग्लेन म्याक्सवेल पनि भारतका लागि खतरा हुनसक्छ ।
अस्ट्रेलियाका स्पीनर एडम जाम्पाले पनि २२ विकेटसहित आफूलाई खतरनाक बलरको रुपमा प्रस्तुत गर्नुभएको छ । यस प्रतियोगितामा अहिलेसम्म भारतको दबदबामा ब्याटिङ मात्र होइन बलिङको पनि उत्तिकै हात छ ।
विशेषत तेज बलर मोहम्मद सामी आफ्नो खेल जीवनकै सबभन्दा उत्कृष्ट लयमा हुनुहुन्छ । सामीले मात्र छ खेलमा २३ विकेट लिइसक्नुभएको छ । सर्वाधिक विकेटकर्ताको सूचीमा सामी शीर्ष स्थानमा हुनुहुन्छ ।
सुरुका चार खेलमा सामी पहिलो रोजाईमा हुनुहुन्नथ्यो । अलराउन्डर हार्दिक पाण्ड्या घाइते भएपछि मात्र सामीले खेल्ने अवसर पाउनुभएको हो । अर्का तेज बलर जस्प्रित बुम्राहले पनि ९१८ विकेट० भारतलाई निराश पारेको छैन । स्पीनरद्वय रविन्द्र जडेजा र कुलदीप यादवले मिलेर ३१ विकेट चट् पारिसक्नुभएको छ ।
समूह चरणमा भारत र अस्ट्रेलियाले एकअर्कासँग नै पहिलो खेल खेलेको थियो । सो खेलमा पहिले ब्याटिङ गरेको अस्ट्रेलिया १९९ रनमै अलआउट भएको थियो । यद्यपि अस्ट्रेलियाले भारतलाई सजिलै लक्ष्य पछ्याउन दिएको थिएन ।
तर अस्ट्रेलिया विश्वकप क्रिकेटमा सँधै अधिपत्य जमाउने टिमको रुपमा रहको छ । अस्ट्रेलिया आठौँ पटक फाइनल खल्दैछ । अस्ट्रलियाले अहिलेसम्म मात्र दुई फाइनल हारेको छ । सन् १९७५ मा भएको पहिलो संस्करणमा वेस्ट इन्डिज र सन् १९९६ मा श्रीलङ्कासँग अस्ट्रेलिया उपाधि भिडन्तमा निराश बनेको थियो ।
विश्वकपमा यी दुई राष्ट्रबिच नकआउटमा अहिलेसम्म तीन पटक मात्र भिडन्त भएको छ । सन् २००३ मा दक्षिण अफ्रिकामा भएको विश्वकपको फाइनलमा अस्ट्रेलियाले भारतलाई नै हराएर उपाधि जितेको थिया ।
सन् २०१५ मा अस्ट्रेलियाले भारतलाई सेमिफाइनलमा हराएर फाइनल पुग्यो र त्यसपछि पाँचौँ पटक विश्वकप उपाधि पनि जित्न सफल भयो । सन् २०११ मा विश्वकपको क्वाटरफाइनलमा भने भारतले अस्ट्रेलियालाई अहमदाबादमा नै हराएको थियो । एपी
