आज विश्वासको मतदान गराइने

काठमाडौँ, वैशाख २७ गते । प्रधानमन्त्री केपी शर्मा ओलीले लिन लाग्नुभएको विश्वासको मतको मतदानमा कोरोना सङ्क्रमित सांसदहरूलाई समेत सहभागी गराइने भएको छ । आइतबार बसेको कार्यव्यवस्था परामर्श समिति बैठकले सङ्क्रमित सांसदहरूलाई स्वास्थ्य मापदण्डसहित मतदानको व्यवस्था गर्ने निर्णय गरेको हो । सङ्घीय संसद् भवनको ल्होत्से हलमा उनीहरूका लागि मतदानको व्यवस्था गरिने छ । हालसम्म २८ सांसद सङ्क्रमित भएको विवरण संसद् सचिवालयले प्राप्त गरेको छ ।
कार्यव्यवस्था परामर्श समितिले विशिष्ट परिस्थिति रहेको भन्दै विश्वास मतको प्रक्रियालाई पनि सोमबार नै टुङ्गो लगाउने निर्णय पनि गरेको छ । दलीय प्रतिनिधित्वमा शीर्ष नेताहरूले मात्र मन्तव्य दिएर सोमबार नै मतदान प्रक्रिया अगाडि बढाउने समझदारी कार्यव्यवस्थामा बनेको हो ।
नेकपा (एमाले) संसदीय दलका प्रमुख सचेतक विशाल भट्टराईले स्वास्थ्य मापदण्ड अपनाएर सङ्क्रमित सांसदलाई मतदानमा सहभागी गराउने निर्णय भएको बताउनुभयो । उहाँले भन्नुभयो, “विश्वास मतको प्रयोजनका लागि मात्र यो अधिवेशन बोलाइएकाले लामो चल्ने अवस्था छैन । कोरोनाका कारण मुलुक आक्रान्त पनि छ । सङ्क्रमित बढिरहेका छन् । सांसद पनि ठूलै सङ्ख्यामा सङ्क्रमित हुनुभएको छ । सङ्क्रमितलाई भोलि विश्वास मतको मतदानमा सहभागी गराउने विषयमा नै छलफल भयो । स्वास्थ्य मापदण्ड अपनाएर मतदानमा सहभागी गराउने निर्णय भएको छ ।”
यस्तै अधिवेशनलाई सकेसम्म सोमबारै सक्ने गरी समझदारीसमेत बैठकले गरेको छ । नेपाल कम्युनिस्ट पार्टी (माओवादी केन्द्र)का प्रमुख सचेतक देव गुरुङले बैठक सकेसम्म छोटो बनाउने र कोरोनाको अवस्थामा कसरी व्यवस्थित बनाउने भन्नेमा पनि छलफल भएको बताउनुभयो । उहाँले भन्नुभयो, “कोभिडको अवस्थामा बैठक कसरी व्यवस्थापन गर्ने भन्नेमा छलफल भयो । धेरै सांसदमा पोजेटिभ देखिएको छ । कतिपयको परीक्षण गर्न नभ्याएको अवस्था छ । पोजेटिभ देखिएकालाई मतदानको अधिकारबाट नछुटाउने ढङ्गबाट तयारी गराउने कुरा भएको छ । सकेसम्म छिटो सक्ने गरी पनि छलफल भयो । ”
यसरी हुनेछ व्यवस्था कार्यव्यवस्थाको निर्णयअनुसार उपत्यका बाहिर रहेका सदस्यलाई पनि यथाशक्य उपत्यका ल्याइने छ । सङ्क्रमित सदस्यलाई सङ्घीय संसद् भवनअगाडि टेन्टमा बस्ने व्यवस्था मिलाइने छ । मतदान प्रक्रिया प्रारम्भ भएपछि भने भवनको ल्होत्से हलमा मतदानको व्यवस्था मिलाइने छ ।
सङ्घीय संसद्का सचिव ध्रुवप्रसाद घिमिरेले कार्यव्यवस्थाको निर्णयअनुसार सचिवालयले तयार पार्ने बताउनुभयो । उहाँले भन्नुभयो, “सङ्क्रमित सांसदहरूलाई बाहिर टेन्टमा बस्ने व्यवस्था मिलाउने छौँ । मतदानमा भने ल्होत्से हलमा उहाँहरूलाई व्यवस्था गरिने छ । तोकिएको स्वास्थ्य मापदण्ड अपनाएर मतदानमा सहभागी गराइने छ । ”
यसरी अघि बढ्ने छ प्रक्रिया
अधिवेशन विश्वास मतको प्रयोजनका लागि बोलाइएकाले अधिवेशनमा अन्य कुनै पनि बिजनेस अगाडि बढ्ने छैन । सोमबारको बैठकमा यसअघिको घोषणाअनुसार प्रधानमन्त्री ओलीले आफ्नो वक्तव्यसहित विश्वासको मत माग्नुहुनेछ ।
प्रधानमन्त्रीले राख्नुभएको प्रस्तावमा छलफलका लागि समय निर्धारण हुनेछ । तोकिएको अवधिको छलफलका क्रममा उठेका प्रश्नमा प्रधानमन्त्रीले जवाफ दिनुहुनेछ । प्रधानमन्त्रीको जवाफपछि प्रस्तावउपर निर्णय प्रक्रिया प्रारम्भ हुनेछ ।
विश्वास मतको प्रस्तावलाई निर्णयार्थ पेस गर्दा मत विभाजन हुनेछ । सदस्यहरूले हस्ताक्षरसहित मत विभाजनमा सहभागी हुन पाउने छन् । संवैधानिक व्यवस्थाअनुसार विश्वास मतको मत विभाजनमा तत्काल कायम रहेको सङ्ख्या गणना हुनेछ । प्रतिनिधि सभामा हाल २७१ जना कायम सङ्ख्या छ । प्रधानमन्त्रीले विश्वासको मत पाउन १३६ सदस्य आवश्यक पर्छ ।
प्रतिनिधि सभामा नेपाल कम्युनिस्ट पार्टी (एमाले)का तर्फबाट १२१ सदस्य छन् तर पार्टीको आन्तरिक विवादका कारण मतदानअघि नै केही सदस्यको राजीनामा वा फ्लोर क्रस हुनेसम्मको आकलन गरिएको छ । एमाले एकै ठाउँमा उभिए पनि प्रधानमन्त्रीलाई विश्वासको मतका लागि थप १५ सदस्य आवश्यक पर्ने छ ।

प्रतिक्रिया दिनुहोस्
सम्बन्धित वर्गका समाचारहरू

रसुवा–भोटेकोशी बाढीमा बेपत्ताको दाबी पेस गर्न दोस्रो सूचना जारी

काठमाडौँ, मङ्सिर ६ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवा–भोटेकोशी बाढीमा परी बेपत्ता

एकता र निर्वाचनको कसीमा एमालेको राष्ट्रिय भेला

मंसिर ३, २०८३, काठमाडौ । एकताबद्ध सन्देश र भावी चुनावी तयारीसँगै कार्यान्वयनको विश्वसनीयता नै यस

नयाँदिल्लीमा ‘नेपाल कलिङ’ : पर्यटन र हवाई सम्पर्कमार्फत द्विपक्षीय सम्बन्ध सुदृढ बनाउन मन्त्री पौडेलको जोड

काठमाडौँ, मङ्सिर ३ गते । संस्कृति, पर्यटन तथा नागरिक उड्डयनमन्त्री खडक राज पौडेल ‘गनेस’ले पर्यटन,

काठमाडौँमा वायु प्रदूषण नियन्त्रण कार्ययोजना आउँदै

मंसिर ३, काठमाडौँ । काठमाडौँ महानगरपालिकाले उपत्यकामा बढ्दो वायु प्रदूषण नियन्त्रणका लागि विशेष कार्ययोजना सार्वजनिक

स्थानीय चुनावलक्षित एमालेको राष्ट्रिय भेला हुँदै

२०८३ कात्तिक ३०,काठमाडौं । नेकपा (एमाले) ले आगामी मंसिर २ र ३ गते काठमाडौंमा राष्ट्रिय

सर्वोच्च अदालतमा चार न्यायाधीश नियुक्त

कार्तिक २७,काठमाडौं । राष्ट्रपति रामचन्द्र पौडेलले सर्वोच्च अदालतको न्यायाधीश पदमा चार जनालाई नियुक्त गरेका छन्।