मास्कमाथिको प्रतिबन्धलाई अवज्ञा गर्दै हङकङमा निकालियो जुलूस

असोज १९, २०७६

काठमाडौं – हङकङमा मास्क लगाएर विरोध प्रदर्शन गर्न सरकारले लगाएको प्रतिबन्धको अवज्ञा गर्दै मानिसहरूले शनिवार प्रदर्शन गरेका छन् । प्रदर्शनका कारण सबवे सेवा स्थगन गरिएको थियो भने धेरै पसल बन्द गरिएका थिए । 

हजारौं विरोधकर्ताले जुलूस निकाले अनि विभिन्न स्थानमा विरोध गरे । 

सरकारले लगाएको मास्क प्रतिबन्धका विरुद्ध प्रदर्शनकारीहरूले मुद्दा समेत दर्ता गरेका छन् । 

प्रतिबन्ध लगाइएको रात व्यापक हिंसा मच्चिएको थियो । जताततै आगजनी गरिएको थियो अनि ड्युटीमा नरहेका एक प्रहरी अधिकारीमाथि आक्रमण समेत भएको थियो । ती अधिकारीले आत्मरक्षाका लागि गोली प्रहार गर्दा १४ वर्षीय एक किशोर घाइते भएका थिए । 

राति उग्र विरोधकर्ताहरूले सबवे स्टेसन र पसलहरूमा तोडफोड गरे, आगजनी गरे अनि सडकमा अवरोध तेर्स्याए । 

भीडले जुलूस निकाल्दा हङकङकी प्रमुख कार्यकारी क्यारी लामले भिडियो वक्तव्य जारी गरेर निकै अँध्यारो रात बनाएको भन्दै विरोधकर्ताको निन्दा गरिन् ।