माघ ९, काठमाडौँ । प्रमुख प्रतिपक्ष दल नेपाली कांग्रेसले अवरोध जारी राखेपछि प्रतिनिधिसभा बैठक शुक्रबारसम्मका लागि स्थगित गरिएको छ।मंगलबार ३ बजेदेखि बैठक सुरु भएको थियो । पहिलो बैठक नै कांग्रेसले अवरुद्ध पारेको थियो । बैठक सुरु हुनासाथ कांग्रेस सांसदहरु उठेपछि सभामुख कृष्णबहादुर महराले प्रकाशमान सिंहलाई समय दिएका थिए । उनले दुबै अस्पताललाई संघीय सरकार मातहतमा ल्याउन निर्णय नभएसम्म संसद चल्न नदिने बताएका थिए ।लगतै कांग्रेस नेताहरुको नाममा रहेको दुईवटा हस्पिटल मन्त्रिपरिषद्को निर्णयबाट केन्द्र सरकारको मातहतमा ल्याउनु पर्ने भन्दै कांग्रेस सांसदहरूले सदन अवरुद्ध गरेपछि सभामुख महराले बैठक १५ मिनेटका लागि स्थगित गरेका थिए ।
दोस्रो बैठकमा पनि कांग्रेस अवरोध जारी राखेपछि १५ मिनेटका लागि बैठक पुनः स्थगित गरिएको थियो ।दोस्रो बैठक सुरु नहुँदै शिक्षामन्त्रीलाई रोक्न कांग्रेसका सांसदहरुले रोष्टम घेराउ गरेका थिए ।नेकपाका सांसदहरुले पनि शिक्षामन्त्री गिरिराजमणि पोखरेललाई रोष्टममा पठाउने प्रयास गरे । तर, कांग्रेसका सांसदहरुले मन्त्रीलाई घेरेर रोष्टममा जान दिएका थिएनन् ।दुई पटककै बैठक अवरुद्ध पारेपछि संघीय संसद सचिवालयले सूचना टाँसेर प्रतिनिधिसभा बैठक आगामी शुक्रबार ११ गते अपरान्ह १ बजेसम्मका लागि स्थगित गरेको हो।सोमबार पनि कांग्रेसले संसद अवरुद्ध पारेको थियो ।
