काठमाडौँ, असोज २ ।सरकारले रातो सूचीमा परेका कालिमाटी फलफुल तथा तरकारी बजारका ५२ स्टलसँगको सम्झौता खारेज गरेको छ भने २५ वटालाई सफाइ दिएको छ ।
कालिमाटी फलफुल तथा तरकारी बजार विकास समितिको बैठकले मनपरि भाडा असुली गरेका तथा नियममा नबसेका कारण ५२ स्टल खारेज गर्ने निर्णय गरको हो । बैठकले २५ वटा स्टललाई सफाइ दिने र सामान्य त्रुटी देखिएको १५ वटा स्टललाई खारेज नगरी थप कागजात माग गर्ने निर्णय गरेको हो ।
मन्त्रालयले गरेको तरकारी बजारको अनुगमनका क्रममा रातो सूचीमा परेका ९८ वटा स्टल मध्ये यसअघि नै ६ वटा खारेजीमा परेका थिए । न्युनतम १०–१२ हजारदेखि २० हजारसम्म स्टल भाडा तोकिएकोमा यी मध्येका धेरैले ४ देखि ५ लाख रुपैयाँसम्म लिएरै अर्कैलाई पसल चलाउन दिएको पाइएपछि छानविन गरी खारेज गर्ने निर्णय गरेको थियो ।
रातो सूचीमा परेपछि स्पष्टीकरण सोधिएको सबै ९८ स्टल सञ्चालकमध्ये चित्तबुझ्दो जवाफ नदिएका स्टल खारेज गरिएको कृषि मन्त्रालयले जनाएको छ ।
