स्पेन विरुद्ध जितेपछि रुसमा यसरी मनाइयो खुसियाली !

एजेन्सी । आइतबारको खेलमा स्पेन विरुद्ध जित हासिल गरेपछि आयोजक रुसले देशभर भव्य उत्सव मनाएको छ । १–१ को बराबरीपछि पेनाल्टि सुटआउटमा स्पेनलाई हराउँदै रुसले क्वाटरफाइनलमा आफ्नो स्थान पक्का गराएको हो । यस खेलपछि रुसमा विश्वकपको माहोल झन रोमाञ्चक मोडमा पुगेको नागरिकहरुको भनाइ छ ।

स्पेनमाथिको अप्रत्यासित जितपछि उल्लासमय बनेको माहोलमा रमाउँदै मानिसहरु बीच सडकमै गाडीमाथि उभिएर नाच्न थालेका थिए र रेलवे स्टेसनमा पनि जताततै रुसको झन्डा देखिएको संचार माध्यम डेलीमेलले जनाएको छ । सडकका गल्ली गल्लीमा उत्साहपूर्वक जित मनाएका फ्यानहरुले रातैभरी रमाइलो गरेका छन् ।

उता सो नतिजाले अहिले राष्ट्रपति पुटिनलाई पनि उत्तिकै खुसी दिलाएको छ किनकी उनले यसअघि नै फाइनलमा उपस्थित हुँदा आफ्ना खेलाडी पनि मैदानमा देख्न चाहेको उल्लेख गरेका थिए । त्यसैगरी खेलमा स्पेनतर्फको बल रोकेर ऐतिहासिक जित दिलाएका रुसका गोलकिपर इगोर अकिनफिभले म्यान अफ द म्याचको शिर्षक पाएका छन् । पेनाल्टिका क्रममा उनले दुईपटक स्पेनको प्रहार रोक्न सफल भएका थिए ।