काठमाडौं, २३ कात्तिक । एकीकरणको अन्तिम तयारीमा पुगेका नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्ड १४ सहरको सयरमा निस्कने निश्चित भएको छ ।

चुनावी सभालाई सम्बोधनका लागि दुई नेता पश्चिमदेखि पूर्वसम्मका सहरमा पुग्न लागेका हुन् । गठबन्धन गरी प्रदेश र प्रतिनिधि सभाको निर्वाचनको तयारीमा जुटेका एमाले र माओवादी केन्द्रले त्यसका लागि तयारी थालेका छन् । २९ कात्तिकदेखि ९ मंसिरसम्म १० दिन ओली–प्रचण्ड साथ साथ सहर घुम्नेछन् ।

ओलीका प्रेस संयोजक चेतन अधिकारीले दुवै नेताले कात्तिक २९ देखि मंसिर ९ गतेसम्म विभिन्न १४ सहरमा आयोजित चुनावी सभालाई सम्बोधन गर्ने बताए । कात्तिक २९ गते गोरखा, कात्तिक ३० गते बागलुङ र स्याङ्जा, मंसिर २ गते दमक, ३ गते काँकडभिट्टा र विराटनगर, मंसिर ५ गते चितवन, मंसिर ६ गते बुटवल र दाङ, मंसिर ७ गते सुर्खेत र दैलेख, मंसिर ८ गते कैलाली र कञ्चनपुर तथा मंसिर ९ गते पोखरामा सम्बोधन गर्ने कार्यक्रम तय भएको छ ।