अमेरिका प्रवेशमा प्रतिबन्ध लगाउने निर्णय अदालतले रोक्यो

१ कात्तिक, एजेन्सी : राष्ट्रपति डोनाल्ड ट्रम्पले ल्याएको ८ देशका नागरिकलाई अमेरिका प्रवेशमा प्रतिबन्ध लगाउने पछिल्लो कानून लागू हुन केही अघि अदालतले रोक लगाएको छ ।

इरान, लिबिया, सिरिया, यमन, सोमालिया, चाड, उत्तर कोरिया र भेनेजुएलाका केही मानिसहरुमाथि गत महिना उक्त प्रतिबन्ध घोषणा गरिएको थियो । ह्वाइट हाउसले अदालतको उक्त आदेश खतरनाक तरिकाले कमजोर भएको भन्दै त्यसविरुद्ध कानुन मन्त्रालय पुनरावलोकनमा जाने बताएको छ ।

समयावधी नतोकिएको ट्रम्पको यसैहप्ताबाट लागू हुने भनिएको उक्त यात्रा प्रतिबन्धलाई संघीय अदालतका न्यायाधीश डेरिक वाट्सनले रोक लगाएका हुन् । यसअघि पनि ६ वटा मुसलमान बाहुल्यता रहेका देशहरुमाथि यात्रा प्रतिबन्ध लगाइएको थियो ।

बुधबारबाट लागू हुन लागेको ट्रम्पको यो तेस्रो यात्रा प्रतिबन्धलाई रोक लगाउन हवाई राज्यमा निवेदन दर्ता भएको थियो । उक्त निवेदनमा आप्रवासीसम्बन्धी संघीय कानुन अन्तर्गत राष्ट्रपतिले त्यस्तो प्रतिबन्ध लगाउन नपाउने उल्लेख थियो ।