उत्तर कोरियाको अर्को मिसाइल

३० भदौ, एजेन्सी : उत्तर कोरियाले फेरी अर्को मिाइल हानेको छ । उत्तर कोरियाको राजधानी प्योङयाङबाट पूर्वतर्फ जापानतिर लक्षित गर्दै मिसाइल हानिएको हो ।

जापानतिर हानिएको मिसाइल ७ सय ७० किलोमिटरको उचारसम्म पुगेको र झण्डै ३ हजार ७ सय किलोमिटर टाढा पुगेको दक्षिण कोरियाका सेनालाई उद्धृत गर्दै बिबिसीले उल्लेख गरेको छ । समाचार एजेन्सी रोयटर्सका अनुसार उक्त मिसाइल स्थानीय समय अनुार बिहान ६ बजेर ५७ मिनेटमा छोडिएको थियो र ७ बजेर ६ मिनेटमा जापानको होकाइदो द्धीपमा खसेको थियो ।

उत्तरले मिसाइल परिक्षण गरेपछि दक्षिण कोरियाले राष्ट्रिय सुरक्षा परिषदको आपतकालीन बैठक बोलाएको छ । जापानले पनि आफ्ना नागरिकलाई सुरक्षित रहन आग्रह गरेको छ । मिसाइल खसेपछि बिहान होकाइदोमा आपतकालिन साइरन बजेको थियो ।

सोमबार संयुक्त राष्ट्रसंघको सुरक्षा परिषद्ले उत्तर कोरियाका विरुद्धमा नाकाबन्दीको कानून पारित गरेको थियो । उत्तर कोरियालाई उसको अर्थतन्त्रमा असर पार्नेगरी मङ्गलबार लगाइएको नाकाबन्दीको विरोधमा झनै कडा रुपमा प्रस्तुत हुने प्रतिक्रिया दिएको छ ।

अमेरिकाको प्रस्तावमा उत्तर कोरियाका विरुद्धमा संयुक्त राष्ट्रसंघले लगाएको नाकाबन्दीलाई उसले दुष्ट कामको संज्ञा दिएको थियो । संयुक्त राष्ट्रसंघको सुरक्षा परिषद्मा सोमबार सर्वसम्मत निर्णय भएपछि उसले भनेको थियो– ‘यसका विरुद्धमा अमेरिकाले अहिलेसम्मकै ठूलो मूल्य चुकाउनुपर्नेछ ।’

उत्तरले गएको हप्ता मात्र एक शक्तिशाली हाइड्रोजन बम नै परीक्षण गरेको थियो । त्यसका विरुद्धमा पछिल्लो नाकाबन्दी आएको हो । त्यसकै जवाफ स्वरुप आज पनि जापानलाई लक्षित गर्दै उसले मिसाइल छाडेको छ ।