राप्रपा सरकारबाट बाहिरियो

काठमाडौं, १८ वैशाख । दोस्रो वरियतामा सत्ता साझेदारीमा रहेको राष्ट्रिय प्रजातन्त्र पार्टीले सरकारबाट बाहिरिने निर्णय गरेको छ ।

पार्टी केन्द्रीय कार्यालय धुम्बाराहीमा सोमबार बसेको कार्यसम्पादन समितिको बैठकले प्रचण्ड नेतृत्वको वर्तमान सरकारबाट बाहिरिने निर्णय गरेको हो । सरकारबाट बाहिरिए पनि आसन्न स्थानीय तहको निर्वाचन सम्पन्न गर्न सहयोग गर्ने र त्यसमा सहभागी हुने राप्रपाले स्पष्ट पारेको छ ।

२७ सिट रहेको राप्रपा सरकारबाट बाहिरिएपछि प्रचण्ड सरकारलाई अर्को झट्का लागेको छ । प्रधानन्यायाधीशविरुद्ध महाअभियोग दर्तासँगै सरकारको व्यापक आलोचना भइरहेको छ । महाअभियोग प्रस्ताव दर्ता भएसँगै राप्रपाका १० सांसदहरुले राप्रपा संसदीय दलको बैठक बहिस्कार गरेका थिए । पार्टी अध्यक्ष कमल थापाले पूर्वराजा ज्ञानेन्द्र शाहले आफ्नो पार्टी फुटाउन खोजेको आरोप लगाउँदै आएका छन् ।

कांग्रेस र माओवादीले संसदमा दर्ता गरेको महाअभियोग प्रस्तावलाई राप्रपाले अनुचित, अनैतिक र न्यायिक स्वतन्त्रतामाथिको हस्तक्षेप भनेको छ । राप्रपाले यस्तो प्रस्ताव ल्याउने दलहरुसँग सहकार्य हुन नसक्ने स्पष्ट पारेको छ । सरकारले छापामार शैलीमा महाअभियोग प्रस्ताव दर्ता गरेर सत्ता साझेदार दलहरुलाई समेत थाहा नदिएको भन्दै राप्रपा अध्यक्ष कमल थापाले प्रधानमन्त्रीको आलोचना गरे ।

राप्रपा अध्यक्ष थापाले मुलुकलाई अस्थिरता र संकटबाट जोगाउन महाअभियोग प्रस्ताव फिर्ता लिन सत्तारुढ गठबन्धनलाई अनुरोध गरे । उनले सरकार छाडे पनि संशोधन प्रस्तावलाई भने समर्थन गर्ने जनाएको छ