काठमाडौं, वैशाख ६ – निर्वाचन आयोगले सत्तारुढ दल तथा राप्रपा तथा सरकारकै उपप्रधानमन्त्री समेत रहेका कमल थापाको पार्टीले आयोगविरुद्ध गरेका पछिल्ला गतिविधिप्रति गम्भीर आपत्ति जनाएको छ ।
आयोगले आज एक विज्ञप्ति जारी गर्दै आयोगले गरेको कार्य सम्पादनलाई लिएर सत्तारुढ दल राष्ट्रिय प्रजातन्त्र पार्टीका अध्यक्ष तथा उपप्रधानमन्त्रीसमेत रहेका सो दलका नेताबाट व्यक्त भएका अभिव्यक्ति र सञ्चार माध्यमबाट प्रकाशित भएका विचारप्रति आयोगको गम्भीर ध्यानाकर्षण भएको जनाएको छ । पार्टीले आयोगको निर्णय जलाएकोप्रति मर्माहत भएको समेत जनाएको छ ।

आयोगले विज्ञप्तिमा भनेको छ –‘नेपालको संविधानले व्यवस्था गरेअनुसार निर्वाचन आयोगले आफ्नो संवैधानिक दायित्व स्वतन्त्ररूपमा निर्वाह गरिरहेको छ र आयोग २०७४ वैशाख ३१ गते आइतबार हुने स्थानीय तह निर्वाचनलाई स्वच्छ, स्वतन्त्र, निष्पक्ष, पारदर्शी तथा विश्वसनीय बनाउन अन्तिम तयारीमा जुटेको व्यहोरा सबैमा विदितै छ ।’

त्यस्तै नेपालको संविधान र कानून अनुसार आयोगले कार्यसञ्चालन गरिरहेको अवस्थामा कानून अनुसार कार्य नगर्न दबाब दिने क्रियाकलापप्रति आयोग गम्भीर आपत्ति प्रकट गर्दै भविष्यमा यस्ता गतिविधिहरू दोहरिन नदिन आयोगले ध्यानाकर्षण गराएको आयोग प्रवक्त सुर्य प्रसाद शर्माद्धारा जारी विज्ञप्तिमा उल्लेख छ ।

राप्रपाले निर्वाचन आयोगले आफ्नो विधानबाट हिन्दुराष्ट्र र राजसंस्था हटाएको विरोधमा मंगलबारमात्रै देशभर आयोगको निर्णयको प्रतिलिपि जलाएको थियो भने बैशाख आठ गते निर्वाचन आयोगको केन्द्रीय कार्यलयसहित ७२ वटै जिल्ला निर्वाचन कार्यलय घेराउ गर्ने जनाएको छ ।