विमानस्थलको टावरसँग केहीबेर सम्पर्क टुटेको जहाज सकुशल अवतरण

फागुन ९ – भारतको मुम्बइबाट बेलायतको लण्डनका लागि उडेको विमान गएको बिहीबार केही समय एयर ट्राफिक कन्ट्रोल टावरसँग सम्पर्क टुटेको खुलेको छ । तीन सय ३० यात्रुसहितको जेट एयरवेजको विमान जर्मनीको आकाशमा रहेका बेला त्यहाँको स्थानीय एयर ट्राफिक कन्ट्रोल टावरसँग सम्पर्क टुटेको हो । गलत रेडियो फ्रिक्वेन्सीका कारण केही मिनेट सम्पर्क टुटेको हिन्दुस्तान टाइम्सले जनाएको छ ।

सम्पर्क केही समय टुटेपछि जर्मनीको हवाई सेनाका दुई विमानले जेट एयरवेजको विमानलाई पछ्याएको भिडियोमा देखिएको छ । जर्मनीको हवाई सेनाले जेट एयरवेजको सुरक्षाका लागि आफ्ना दुई विमान खटाएको हो ।

केही मिनेटपछि नै एयर ट्राफिक कन्ट्रोल रुमको टावरसँग विमानको सम्पर्क स्थापित भएको र विमान सुरक्षित रुपमा लण्डनमा अवतरण भएको जेट एयरवेजले जनाएको छ । जेट एयरवेजको विमानमा ३३० यात्रु र चालक दलका १५ सदस्य थिए ।

जेट एयरवेजको सुरक्षाका लागि खटिएको जर्मनीको हवाई सेनाको विमानका पाइलटले खिचेको भिडियो भने आइतबार सामाजिक सञ्जालमा भाइरल भएको छ । जेट एयरवेजका विमानको चालक दलका सदस्यले गलत रेडियो फ्रिक्वेन्सी ट्युन गरेकाले सम्पर्क टुटेको हो ।