फागुन ८, काठमाडौं ।
गगन थापाले राष्ट्रिय स्वतन्त्र पार्टीका वरिष्ठ नेता बालेन शाहप्रति कटाक्ष गर्दै आक्रोश व्यक्त गरेर मात्र सडक निर्माण समयमा सम्पन्न नहुने बताएका छन्। राष्ट्रिय सभागृहमा बिहीबार आयोजित प्रतिज्ञा सभालाई सम्बोधन गर्दै थापाले सडक निर्माण ढिलाइका विषयमा कानुनी तथा संरचनागत सुधार आवश्यक रहेको उल्लेख गरे।
उनले भने, “सडक समयमा नबनाउनेलाई ठोक्दिन्छु, घोक्राइदिन्छु भनेर कोही बोलेको मैले सुनेको थिएँ। तर कसैलाई घोक्राएर सडक समयमा बन्दैन। सडक समयमा बनाउन ४१ वटा कानुन संशोधन गरेर प्रणाली बदल्नुपर्छ।” यसअघि बुधबार धनगढीमा आयोजित सभामा शाहले समयमै सडक निर्माण नभए कडा कदम चाल्नुपर्ने अभिव्यक्ति दिएका थिए। उनले २ वर्षमा सम्पन्न हुनुपर्ने सडक २० वर्षसम्म नबन्ने अवस्थाप्रति असन्तुष्टि जनाउँदै “रूखमा बाँधेर, बाटोमा सुताएर वा खोरमा जाकेर भए पनि सडक बन्नुपर्छ” भन्ने धारणा सार्वजनिक गरेका थिए।
शाहले विपन्न वर्गका लागि शिक्षा र स्वास्थ्य सेवामा पहुँच सुनिश्चित गर्नु आफ्नो प्रमुख एजेन्डा रहेको पनि बताएका थिए।
थापाले सोही अभिव्यक्तिप्रति संकेत गर्दै सडक निर्माणको समस्या समाधानका लागि कानुनी सुधार, नीतिगत स्पष्टता र प्रशासनिक क्षमता अभिवृद्धि आवश्यक रहेको धारणा व्यक्त गरेका हुन्।
