ओली–प्रचण्ड भेट: सहकार्यको संकेत, तीन दल नजिकिने तयारी?

 पुस २१ ,काठमाडौं । भारत भ्रमणअघि एमाले अध्यक्ष केपी शर्मा ओली र नेकपा संयोजक पुष्पकमल दाहाल ‘प्रचण्ड’बीच आइतबार बिहान करिब आधा घण्टा भेटवार्ता भएको छ। ललितपुरको एक निजी घरमा भएको भेटमा राष्ट्रियसभा सदस्य चुनाव, २१ फागुनको निर्वाचन र दलगत सहकार्यबारे छलफल भएको नेतानिकट स्रोतले जनाएको छ।

प्रचण्ड सचिवालयका अनुसार दुवै नेता चुनावमा सहभागी हुनुपर्नेमा सहमत देखिए पनि सरकारले चुनावको अनुकूल वातावरण नबनाएको निष्कर्षमा पुगेका छन्। भेटलाई तत्काल सहमतिभन्दा पनि निरन्तर संवाद र विश्वास निर्माणतर्फको ‘आइसब्रेक’का रूपमा हेरिएको छ।

राष्ट्रियसभा चुनाव र आगामी निर्वाचनमा सहकार्यबिना परिणाम हासिल गर्न कठिन हुने बुझाइ दुवै पक्षमा देखिएको छ। यसक्रममा कांग्रेस, एमाले र नेकपा मिलेर साझा रणनीति बनाउने सम्भावनाबारे समेत अनौपचारिक छलफल भएको बताइएको छ।

नेताहरूले आन्तरिक राजनीति र भूराजनीतिक अवस्थाको विश्लेषणसमेत गरेका छन्। स्रोतका अनुसार प्रमुख दल कमजोर पार्ने प्रयास भइरहेको निष्कर्षसहित तीन दल मिलेर वैकल्पिक राजनीतिक शक्तिसँग प्रतिस्पर्धा गर्नुपर्ने बहस अघि बढेको छ।