पुस १७, काठमाडौं ।
काठमाडौं उपत्यकाका नदी तथा खोलाको मापदण्ड खारेजको माग गर्दै खोला किनारका पीडितहरूले माइतीघर मण्डलामा प्रदर्शन गरेका छन्। गैरन्यायिक रूपमा लागू गरिएको खोला तथा सडक मापदण्ड खारेज गर्न माग गर्दै गैरन्यायिक सडक तथा खोला मापदण्ड पीडित संघर्ष समितिको आयोजनामा प्रदर्शन गरिएको हो। बागमती, विष्णुमती, मनोहरा लगायत नदी तथा खोलाका किनारमा बसोबास गर्ने पीडितहरू प्रदर्शनमा सहभागी थिए।
प्रदर्शनकारीहरूले ‘मापदण्डको नाममा जनता विस्थापित गर्न पाइँदैन’, ‘फैसला होइन, न्याय देऊ’ र ‘जनतालाई उठिबास गराउने गैरन्यायिक खोला मापदण्ड खारेज गर’ जस्ता नारा लेखिएका ब्यानर बोकेर आफ्ना माग राखेका थिए।
दुई वर्षअघि सर्वोच्च अदालतले नदी क्षेत्र संरक्षणका लागि बागमती, विष्णुमती, मनोहरा लगायत उपत्यकाका ठूला नदी तथा खोलामा किनारबाट थप २० मिटर जग्गा छाडेर मात्र संरचना निर्माण गर्न पाउने आदेश दिएको थियो। यसअघि २०६५ सालमा पनि मन्त्रिपरिषद्ले २० मिटर छाड्नुपर्ने निर्णय गरेको थियो।
सर्वोच्च अदालतको आदेश कार्यान्वयनका लागि काठमाडौं महानगरपालिकाले सूचना जारी गरेपछि प्रभावित क्षेत्रका बासिन्दाहरूले मापदण्ड खारेजको माग गर्दै आन्दोलन थालेका हुन्।
