मुख्यसचिव र मुख्य रजिस्ट्रारको कार्यकाल २ वर्ष, सचिवको ४ वर्ष कायम गर्ने सहमति

२०८२ भदौ १२ , काठमाडौं । नेपाल सरकारको मुख्यसचिव र सर्वोच्च अदालतको मुख्य रजिस्ट्रारको पदावधि २ वर्ष र सचिवको पदावधि ४ वर्ष कायम गर्ने सहमति राष्ट्रिय सभाको विधायन व्यवस्थापन समितिमा भएको छ।

प्रतिनिधि सभाबाट पारित संघीय निजामती सेवा विधेयकमाथि दफावार छलफल भइरहेका बेला यस्तो सहमति बनेको हो। प्रतिनिधि सभाले यसअघि नै मुख्यसचिव र मुख्य रजिस्ट्रारको कार्यकाल २ वर्ष र सचिवको ४ वर्ष कायम गर्ने प्रावधान पारित गरिसकेको छ।

यसअघि संघीय मामिला तथा सामान्य प्रशासन मन्त्रालयले पेश गरेको विधेयकमा मुख्यसचिव र मुख्य रजिस्ट्रारको पदावधि ३ वर्ष र सचिवको पदावधि ५ वर्ष रहने प्रस्ताव गरिएको थियो।

हाल कार्यान्वयनमा रहेको निजामती सेवा ऐन, २०४९ अनुसार पनि मुख्यसचिव र मुख्य रजिस्ट्रारको पदावधि ३ वर्ष र सचिवको ५ वर्ष नै छ। नयाँ सहमतिपछि निजामती सेवाको पदावधि सम्बन्धी प्रावधानमा फेरबदल हुने देखिन्छ।