पर्वतारोहण संघ बन्यो ‘मानव तस्करीको अखडा’ : अध्यक्षकै संलग्नतामा ३ पदाधिकारी क्यानडामै लुकेको खुलाशा
Tara Nidhi
आषाढ ०४, काठमाडौं । नेपालको हिमाली पर्यटनको प्रवद्र्धन गर्ने उद्देश्यले विक्रम सम्बत २०३० को दशकमा स्थापना भएको नेपाल पर्वतारोहण संघ (एनएमए) पछिल्लो समय ‘मानव तस्करीको माध्यम’ बनेको छ ।
एनएमएका विभिन्न कार्यक्रमका नाममा विदेश गएकाहरु फर्कनुको सट्टा उत्तै लुक्ने गरेका छन् । यसरी विदेश जानेहरुलाई एनएमएकै उच्च अधिकारीहरुले सिफारिस गर्ने गरेको तथ्य भेटिएको छ । त्यतिमात्रै होइन एनएमएका पदाधिकारी समेत कार्यक्रमको बहानामा विभिन्न मुलुकमा जाने र उतै बेपत्ता हुने गरेका छन् । तर, यसरी पदाधिकारी नै विदेशमा लुक्दा समेत एनएमएका पदाधिकारीहरु मौन रहेका छन् ।
संघको सदस्यमा निर्वाचित रामचन्द्र धमला माउन्टेन गाइड ट्रेक्स एण्ड एक्सपीडिसनका मालिक हुन् । तर, उनको मोबाइल स्विच्ड अफ भएको धेरै महिना भयो । उनी संघकै सिफारिसमा क्यानडा गएको उनी निकटस्थहरु बताउँछन् । कम्पनिको वेभसाइटमा उल्लेखित नम्बरमा सम्पर्क गर्दा फोन उठाउने व्यक्ति आफू प्रदीप भएको बताए । उनै प्रदीपले रामचन्द्र विदेश गएको बताए । आफूले कोरोना अघि नै अफिस छाडेको बताए । तर, वेभसाइटमा भने उनकै नम्बर उल्लेख गरिएको छ । संघकै सिफारिसमा क्यानडा भासिएका उनलाई फिर्ता ल्याउन संघले कुनै कोशिस नगरेको अर्का एक अधिकारी बताउँछन् ।
‘अध्यक्ष र महासचिवकै सिफारिसमा उनी क्यानडा गएका हुन् । क्यानडा पुगेपछि उतै काम गर्ने र लुक्ने योजना रहेछ । यस्तो काममा संघको दुरुपयोग भइरहेको छ । यसमा कसैले कुनै कारबाही गरेका छैनन्,’ एक अधिकारीले दियोपोस्टसँग भने ।
संघकै अर्का सदस्य लाल बहादुर वाइवा पनि यतिबेला क्यानडा नै लुकेका छन् । केन्द्रीय पदाधिकारी रहेका उनी पनि धमलासँगै क्यानडा गएका हुन् । संघको पदाधिकारीको पद दुरुपयोग गर्दै क्यानडा हानिएका वाइबाले राजिनामा दिएका छैनन् । धमलाले पनि राजिनामा दिएका छैनन् । संघले दुवैलाई पत्राचारगरि राजीनामा दिन निर्देशन दिएको छ । तर, हालसम्म उनीहरु संघको सम्पर्कमा समेत नरहेको स्रोत बताउँछ ।
त्यस्तै संघकै अर्का सदस्य डोमा शेर्पा पनि कार्यक्रमको नाममा क्यानडा नै लुकेकी छिन् । क्यानडाको बाँफमा गत २९ अक्टोबरमा भएको इन्टरनेसनल क्लाइम्बिङ एन्ड माउन्टेनेरिङ फेडेरेसन (युआइएए) को साधारणसभामा सहभागी हुन गएकी नेपाल पर्वतारोहण संघकी सञ्चालक समिति सदस्य शेर्पा उत्तै भागेकी छिन् । उनलाई भगाउने कार्यमा संघका अध्यक्ष निमानुरु शेर्पा नै संलग्न रहेको स्रोतको दाबी छ । अल्पाइन क्लब अफ क्यानडाले गरेको सभामा सहभागी हुन संघका अध्यक्ष शेर्पाको टोलीसँगै उनी गत २८ अक्टोबरमा नेपालबाट क्यानडा उडेकी थिइन् ।
सभा सकिएलगत्तै टोलीमा सहभागी सबै नेपाल फर्केपनि शेर्पा अझै उतै छिन् । टोलीमा संघका महासचिव मोहन लम्साल, पर्यटन विभागका महानिर्देशक होमप्रसाद लुइँटेल सहभागी थिए । सरकारी टोली समेत संलग्न भएर डोमालाई क्यानडा लुकाएको आरोप छ । जबकी यस्तै मुद्दामा सरकारले कयौँलाई मुद्दा लगाएर कारबाही गरिरहेको छ । तर, संघका पदाधिकारीमाथि हालसम्म कुनै कारबाही त के छानबीन समेत भएको छैन । संघका अध्यक्ष निमा नुरु शेर्पालाई यस विषयमा प्रतिक्रिया लिन सम्पर्क गर्दा उनको मोबाइल अफ छ ।
महासचिव भन्छन्,‘निवेदन आएको छ, ६ महिना कारबाहीका लागि कुर्नै पर्ने भयो’
संघका महासचिव मोहन लम्सालले विदेशमा रहेका तीनै जनाले संघमा ईमेल मार्फत निवेदन दिएको बताए । उनका अनुसार अघिल्लो पटक कार्यक्रममै सहभागी भएर उतै लुक्न सफल भएकी डोमा शेर्पाले जुम मार्फत बैठकमा भाग लिने र आफू केही समयमा नेपाल फर्कने जानकारी गराएकी छिन् । उनको लिखित निवेदन चित्त नबुझेका कारण थप पत्राचार गर्ने तयारीमा रहेको लम्सालले जानकारी दिए । त्यस्तै धमला र वाइबाले भने अध्ययनका लागि क्यानडामा केही समय बसेको र फर्कने निवेदन संघलाई दिएका छन् । तर, उनीहरु कोही पनि विद्यार्थी भिषामा क्यानडा गएका भने होइनन् । क्यानडाको कार्यक्रमकै आवरणमा उनीहरु लुकेका हुन् ।
