९ वैशाख, सुर्खेत
नेपाल ट्रेड युनियन महासंघ (जिफण्ट) ले सञ्चालन गरेको तीनमहिने मर्यादित कामको लागि जिफण्ट अभियान २०७९ अन्तरगत कर्णाली प्रदेश कमिटीको समिक्षा बैठक शनिबार सुर्खेतको वीरेन्द्रनगरमा सम्पन्न भयो ।

बैठकमा प्रदेश अभियान संयोजक तथा राष्ट्रिय कमिटी सदस्य चन्द्रा धामीले अभियानको विषयमा रिपोर्टिङ गर्नुभएको थियो ।

बैठकमा जिफण्ट प्रदेश कमिटी, पालिका कमिटी, घटकका केन्द्रीय पदाधिकारी, घटकका प्रदेश कमिटी, जिल्ला कमिटी र पालिका कमिटीका अगुवाहरुको सहभागीता रहेको थियो ।

सहभागीहरुले संगठनलाई गति प्रदान गर्न ट्रेड युनियन शिक्षालाई श्रमिकहरुबीच लैजान र प्रशिक्षित गर्न माग गरेका थिए ।

प्रदेश अध्यक्ष तेजप्रकाश जि.सी.ले अभियानका क्रममा सहयोग गर्ने सबै कमिटीलाई धन्यवाद दिंदै आगामी दिनहरुमा संगठन परिचालन, सामाजिक न्याय र श्रमिकहरुबीच जिफण्टका योजनाहरु पुर्याउन र प्रतिफल हासिल गर्न थप उर्जा सहित परिचालित हुनु पर्नेमा जोड दिनु भयो । अध्यक्षले परिपूर्ण लोकतन्त्रको अभ्यासलाई कडाइका साथ पालना गर्न गराउन प्रदेश र स्थानीय तहमा निरन्तर सामाजिक सम्वद गर्ने योजना रहेको बताउनु भयो ।

आफ्नै हितको लागि संगठनमा आफ्नै लगानी महत्वपूर्ण हुने बताउँदै बैठकका प्रमुख अतिथि राष्टिय कमिटी उपाध्यक्ष रमेश बडालले समग्रमा अभियान सन्तोषजनक रहेको र आगामी दिनमा खटिएर लाग्नुहोस्, परिवर्तन सम्भव रहेको बताउनु भयो ।

बडालले संगठनमा हैसियत राख्नुपर्छ, सामाजिक सुरक्षा लागु गराउनमा आँट भरोसा, तरिका र निरन्तर लविङ जरुरी भएको धारणा राख्दै राजनैतिक विरोधका विरुद्ध एकजुट भएर लाग्न निर्देशन दिनु भयो ।

बैठकलाई सम्बोधन गर्दै राष्ट्रिय कमिटी सचिव तारानिधि पन्तले संगठन सुदृढिकरण गठन, पुर्न गठन र सदस्य बिस्तारलाई व्यवस्थित गर्दै लैजान घटक र पालिका कमिटीलाई ठोस निर्देश गर्नुभयो ।
जिफण्ट आवद्ध दश वटा घटकका अगुवा कार्यकर्ताहरुको उपस्थिति रहेको सो समिक्षा बैठकलाई प्रदेश उपाध्यक्ष राधा श्रेष्ठले स्वागत गर्नु भएको थियो भने बैठकको संचालन सचिव श्रीपाल सारु मगरले गर्नु भएको थियो ।