सामाजिक संरचना च्यात्ने प्रयास भइरहेको छ : ज्ञानेन्द्र शाह

२१ चैत,काठमाडौं । पूर्व राजा ज्ञानेन्द्र साहको नागरिक अभिननन्द गरिएको छ । सुनसरीको इनरुवामा शाहको नागरिक अभिनन्दन गरिएको हो । पछिल्लो केही दिनयता शाह झापाको दमकमा बस्दै आएका छन् । नागरिक अभिनन्दनका लागि शाह सोमबार दिउँसो इनरुवा पुगेका थिए ।

इनरुवाको खेल मैदानमा शाहको नागरिक अभिनन्दन कार्यक्रममा सर्वसाधारणको भिड लागेको थियो । उनको अभिनन्दनका लागि केशरबहादुर विष्टको संयोजकत्वमा १ हजार १ सदस्यीय समिति मार्फत तयारी गरिएको थियो ।

अभिनन्दनपछि पूर्वराजा शाहले राष्ट्रिय स्वाभिमान, अखण्डता तथा सार्वभौमिक स्वतन्त्रता जोगाउनु पर्ने बताए । व्यक्ति, परिवार, समूह, दल वा गुटमा अल्झिएर नभई सुहाउँदो राष्ट्रिय अवधारणालाई प्रवाह गर्नु पर्ने बताए ।

‘स्थिरता र स्थायित्व सही राज्यपद्धति, शान्ति एवं अनुशासन बिना हुन सक्दैन, कसैलाई धन, कसैलाई मन, कसैलाई पद र कसैलाई कद दिएर, लोभाएर हाम्रो सामाजिक संरचना च्यात्ने प्रयास भइरहेको छ,’ उनले भने,‘ परिवर्तन देखाउन अहिलेको कोरा र सतही फेरबदल आलटाल र टालटुलको प्रणालीले कुनै खदीलो परिणाम दिदैन ।’