काठमाडौँ, १२ चैत । नेपाली कांग्रेसका सभापति तथा प्रधानमन्त्री शेरबहादुर देउवाले प्रमुख प्रतिपक्षी दल नेकपा एमाले देशभर बलियो अवस्थामा रहेकाले आगामी स्थानीय तहको निर्वाचनमा गठबन्धन गरेर जानुको विकल्प नभएको स्वीकारोक्ती गर्नुभएको छ ।
आज बिपी स्मृति सामुदायिक सहकारी अस्पतालको १४ औं वार्षिक साधारणसभामा देउवा र शेखर कोइराला एउटै मञ्चमा एउटै मञ्चबाट सवाल-जवाफ पनि चलेको छ । मन्तव्य राख्ने क्रममा प्रधानमन्त्री देउवाले गठबन्धन गर्न आवश्यक रहेको बताउनुभयो । त्यस्तै कोइरालाले गठबन्धन गर्दागर्दै छिमेकी मुलुक भारतको कांग्रेस आईको अवस्था चारैतिर कमजोर भएको अवस्था सुनाउनुभयो । देउवाले एमाले र माओवादी फुटेकाले जितिहाल्छौं भनेर ढुक्क हुने अवस्था नरहेको बताउनुभयो ।
सभापति देउवाले भन्नुभयो, ‘पार्टी कमजोर नहोस्, बलियो होस् । सहमति गरेर कहाँ-कहाँ सकिन्छ गठबन्धन गरौं, ओलीजीको पार्टी धेरै बलियो छ, एक्लै जितिएला भन्ने आशंका नगरे हुन्छ । फेरि प्रचण्ड पनि हार्नका लागि उठ्दैनन् । एमालेसँग मिलिदिन सक्छन् ।’
नेता कोइरालाले नेपाली कांग्रेसको आफ्नै विचार, सिद्धान्त रहेको भन्दै त्यही विचार र सिद्धान्तलाई अगाडि बढाई पार्टीभित्रको गुटउपगुटलाई मिलाए गठबन्धन बनाएर जानुपर्ने आवश्यकता नरहेको उल्लेख गर्नुभयो । कोइरालाले स्थानीय चुनावमा मात्रै नभएर प्रदेश र प्रतिनिधिसभा निर्वाचन जित्न जरुरी रहेको बताउनुभयो ।
उहाँले भन्नुभयो, ‘गुटउपगुटलाई मिलाएर लैजाने प्रयास आदरणीय सभापतिले गरिरहनुभएको छ, गर्नुपर्छ, अझ जिम्मेवार ढंगले मिलाएर अगाडि लैजान आग्रह गर्छ । एकातिर गठबन्धन गरेर जाने, तर कांग्रेसका कार्यकर्ताबीच मेलमिलाप नहुने भयो भने जतिसुकै गठबन्धन गरे पनि औचित्य हुँदैन। गठबन्धन कसरी गर्ने के गर्ने भन्नेकुरा केन्द्रीय समितिमा छलफल हुँदैछ । त्यो छलफलले निचोड निकाल्छ । निर्वाचनमा एमाले र माओवादी उभिए एकठाउँमा मिल्ला भन्ने हाम्रो चिन्ता हो। गठबन्धन गर्दा कहीँ नेपाली कांग्रेसको विचार सिद्धान्त कमजोर हुन्छ कि भन्ने चिन्ता त्यतिकै छ । गठबन्धन गर्दा नेपाली कांग्रेस कता(कता मलाई आभाष हुन्छ, भारतको कांग्रेस आई सम्झन्छु । १० वर्षअघिको कांग्रेस आई आज चारैतिर कमजोर भएको अवस्था छ ।’
