काठमाडौं, फागुन १४ । प्रधानमन्त्री तथा सत्तारुढ नेपाल कम्युनिष्ट पार्टी (नेकपा) को संसदीय दलका नेता केपी शर्मा ओलीले दलको प्रमुख सचेतकमा विशाल भट्टराईलाई नियुक्त गर्नुभएको छ । प्रतिनिधिसभा पुनःस्थापनापछि संसदमा प्रभावकारी भुमिका निर्वाहका लागि प्रधानमन्त्री ओलीले प्रमुख सचेतक देव गुरुङलाई बर्खास्त गरी युवा नेता भट्टराईलाई प्रमुख सचेतक मनोनयन गर्नुभएको हो ।
नवनियुत्तः प्रमुख सचेतक भट्टराईलाई प्रधानमन्त्री ओलीले आजै संसदीय दलका उपनेता सुवास नेम्वाङसहितका नेताहरुको उपस्थितिमा नियुक्तिपत्र दिनुभएको छ । खोटाङबाट दुईपटक निर्वाचित सांसद भट्टराई नेकपा केन्द्रीय सदस्य समेत हुनुहुन्छ । अनेरास्ववियुबाट राजनीतिमा उदाउनु भएका भट्टराई २०५१ सालमा महेन्द्ररत्न क्याम्पस ताहाचलको स्ववियु सभापति निर्वाचित हुनुभएको थियो ।
नेकपाको बिधानमा दलको नेताले उपनेता, प्रमुख सचेतक र सचेतक मनोयन गर्ने व्यवस्था रहेको छ । पार्टी विभाजनले कानुनी मान्यता नपाइसकेको अवस्थामा विधिवत रुपमा नेकपाको संसदीय दल एउटै छ । सो दलबाट प्रमुख सचेतक गुरुङ र सचेतक शान्ता चौधरी हुनुहुन्थ्यो । चौधरी सचेतकमा यथावत हुनुहुन्छ ।
