काठमाडौं, ३० साउन । नेपाल कम्युनिस्ट पार्टी फुटको संघारबाट तत्काल जोगिएको छ । सचिवालयका छ जना नेताहरु एकसाथ अध्यक्ष केपी शर्मा ओलीविरुद्ध एकजुट भएर प्रहारमा लाग्दा पार्टी फुटको संघारमा पुगिसकेको थियो । तर, घटना मोडिएर सहमतिको बिन्दु नजिक पुग्ने अवस्था बन्यो । त्यसमा बामदेव गौतमको ‘यु टर्न’ नै मुख्य कारण छ ।
ओलीविरुद्ध बनेको मोर्चामा नेकपा उपाध्यक्ष बामदेव गौतम समेत रहेकोमा उनले अचानक आफू कुनै गुट या पक्षमा नरहेको घोषणा गरे । लगत्तै छ बुँद सहमतिको प्रस्ताव सार्वजनिक गरे जुन ओलीलाई फाइदा पुग्ने खालको थियो । यसअघि ओलीलाई राजीनामा गर्न वाध्य पार्ने समुहमा रहेका गौतमले चालेको कदमले तरंग नै ल्यायो । छ बुँदे एकताका लागि सहमतिको प्रस्तावमा ओलीलाई अध्यक्ष र प्रधानमन्त्री दुवैमा यथावत रहने, अर्ली महाधिवेशन गर्ने, सम्पूर्ण अधिकारसहित पार्टीको कार्यकारी अधिकारलगायतको विषय समावेश थियो ।
गौतमले छ बुँदे प्रस्ताव ल्याएकै साँझ ओली भैंसेपाटी पुगेर डिनरसहितको भेट गरे । यसलाई उनले छ बुँदे प्रस्तावलाई सहमति दिएको सन्देशका रुपमा लिइयो । नभन्दै गौतमले ओलीलाई साथ दिए । प्रचण्डले अर्को दिन भेटेर तपाईं कुन पक्ष भन्दा आफू कुनै पक्षमा नभएको तर एकताको पक्षमा रहेको भनी जवाफ दिए । यसबाट प्रचण्ड, माधवकुमार नेपाल र झलनाथ खनालमाथि दबाब बढ्यो ।
नेकपाभित्र बामदेवको यु टर्नले छ बुँदेलाई केही परिमार्जन गरी सहमतिको सुत्र निकाल्नेबारे छलफल बढ्यो । हिजो बालुवाटारमा ओली र प्रचण्डबीच यसै विषयमा छलफल केन्द्रित भयो । आज फेरि बैठक बसी विवाद समाधान गर्न कार्यदल बनाउने निर्णय भयो । महासचिव विष्णु पौडेलको संयोजकत्वमा गठित कार्यदलमा स्थायी कमिटी सदस्यहरु भीम रावल, जर्नादन शर्मा, शंकर पोखरेल, सुरेन्द्र पाण्डे र पम्फा भुषाल छन् । समिति विष्णु पौडेल र शंकर पोखरेल ओली पक्षधर हुन्, जर्नादन शर्मा र पम्फा भुषाल प्रचण्ड निकट हुन् भने भमि रावल र सुरेन्द्र पाण्डे माधव नेपाल पक्षधर हुन् ।
यसैगरी, आज विहान प्रचण्ड र गौतमबीच टेलिफोन वार्ता भएको थियो । वार्तामा नेकपा विवाद समाधानको सुत्र निकाल्नेबारे छलफल भएकोमा गौतमले छ बुँदेलाई टेकेर बढ्न आग्रह गरेका थिए । अब नेकपाभित्रको विवाद समाधानका लागि छ बुँदे नै मुख्य आधार बनेको छ । यसैको आधारमा टेकेर सहमतिको खाका बनाइने बुझिएको छ ।
