- असार ६,
सत्तारूढ दल नेपाल कम्युनिस्ट पार्टी (नेकपा)ले नेपाली पुरुषसँग बिहे गरेर आउने विदेशी महिलालाई ७ वर्षपछि वैवाहिक अंगिकृत नागरिकता दिन सकिने निर्णय गरेको छ ।
शनिवार बसेको सचिवालय बैठकमा संसदमा विचाराधीन रहेको नागरिकता विधेयकका कतिपय प्रावधानहरूमा छलफल भइरहेको सन्दर्भमा नेकपाले यस्तो निर्णय गरेको हो l
बैठकपछि सञ्चारकर्मीहरूसँग कुरा गर्दै प्रवक्ता नारायणकाजी श्रेष्ठले भने, ‘नेपाली नागरिकसंग विवाह गर्ने विदेशी महिलाले प्राप्त गर्ने अंगीकृत नागरिकताबारे भएको छलफलमा ७ वर्ष देशभित्र बसेको पुष्टि भएपछि विदेशमा नागरिकता वा त्यस्तै प्रमाणपत्र लिएको भए त्यसलाई परित्याग गर्ने कारवाही चलाएको प्रमाण पेश गरेपछि नेपालमा वैवाहिक अंगीकृत नागरिकता पाउन सक्ने सहमति भएको छ ।’
उनले सामाजिक सांस्कृतिक अधिकार भने विवाह गरेको दिनदेखि नै प्राप्त गर्न सकिने बताए ।
