भारत संयुक्त राष्ट्रसंघको सुरक्षा परिषद्को अस्थायी सदस्य निर्वाचित, नेपालले पनि दियो पक्षमा भोट

काठमाडाैं, असार ५ : भारत संयुक्त राष्ट्रसंघको शक्तिशाली सुरक्षा परिषदमा दुई वर्षका लागि अस्थायी सदस्यमा निर्वाचित भएको छ । बुधवार भएको निर्वाचनमा १९३ सदस्यीय महासभामा भारतले १८४ मत पाएको हो ।

भारतसँगै आयरल्यान्ड, मेक्सिको र नर्वे पनि अस्थायी सदस्यमा निर्वाचित भएका छन् । मतदानमा १९२ सदस्य राष्ट्र उपस्थित थिए । दुईतिहाइ बहुमतका लागि १२८ मत आवश्यक थियो । भारतले १८४ मत पायो भने क्यानडाले चुनाव हार्‍यो । भारतका विरुद्ध कसैले पनि मत दिएन । नेपालले पनि भारतकै पक्षमा मत दिएको थियो ।

भारतले एसिया प्रशान्त क्षेत्रका सदस्य मुलुक सबैको भोट पाएको थियो । चीन र पाकिस्तानले पनि उसको पक्षमा मत दिएका थिए । सुरक्षा परिषद्का स्थायी सदस्यहरू चीन, फ्रान्स, रुस, बेलायत र अमेरिका हुन् भने अहिले अस्थायी सदस्यहरू इस्टोनिया, नाइजर, सेन्ट भिन्सेन्ट यान्ड द ग्रेनाडिन्स, ट्युनिसिया र भियतनाम छन् । 

नेपाल पनि सन् १९६९–७० र १९८८–८९ मा सुरक्षा परिषद्को अस्थायी सदस्यमा निर्वाचित भएको थियो । पञ्चायतकालमा त्यसरी विजय भएको नेपाल बहुदल लागेपछि भएको निर्वाचनमा चाहिँ लज्जास्पद रूपमा पराजित भएको थियो ।