भारतमा एकैदिन दुई हजार ३ जना कोरोना संक्रमणबाट मृत्यु

काठमाडौं । भारतमा पछिल्लो चौबीस घण्टामा कोरोना संक्रमणबाट अहिलेसम्मकै अधिक मानिसको मृत्यु भएको छ । भारतीय स्वास्थ्य मन्त्रालयका अनुसार भारतमा एकैदिनमा दुई हजार ३ जनाको मृत्यु भएको हो ।

हालसम्म भारतभर कोरोना संक्रमणबाट मृत्यु हुनेको संख्या ११ हजार ९०३ पुगेको छ । त्यसैगरी एकदिनमा १० हजार ९७४ कोरोना संक्रमित थपिएका छन् । यससँगै भारतमा कुल कोरोना संक्रमितको संख्या तीन लाख ५४ हजार ६५ पुगेको छ ।

जसमा एक लाख ५५ हजार २२७ सक्रिय कोरोना संक्रमित हुन् भने एक लाख ८६ हजार ९३५ संक्रमितको उपचारपछि अस्पतालबाट डिस्चार्ज भएको स्वास्थ्य मन्त्रालयले जनाएको छ ।

भारतमा मंगलबार ३८० कोरोना संक्रमितको मृत्यु भएको थियो भने बुधबार अहिलेसम्मकै उच्च संख्यामा देखिएको मृत्यु  हो । भारतमा सबैभन्दा बढी महाराष्ट्र प्रभावित भएको छ । जहाँ एक लाख १३ हजार ४५ कोरोना संक्रमित छन् । जसमा ५० हजार ५७ सक्रिय संक्रमित रहेका छन् । महाराष्ट्रमा ५ हजार ५३७ कोरोना संक्रमितको मृत्यु भएको छ । –डीएनए इन्डिया