काठमाडौं, २१ फागुन । पोखरामा बुधबारदेखि प्याराग्लाइडिङ बन्द हुने भएको छ । व्यावसायीले प्याराग्लाइडिङ उडान गरेबापतको कर तिर्न अटेरी गरेपछि प्याराग्लाइडिङ बन्द हुने भएको हो
पोखरा महानगर र प्याराग्लाइडिङ उडान हुने वडा कार्यालयले कर तिर्नका लागि पत्र लेखे पनि व्यवशायीले अटेरी गरेपछि प्याराग्लाइडिङ उडान नै बन्द गर्न लागिएको हो ।
पोखरा महानगरपालिकाका प्रमुख प्रशासकीय अधिकृत शेषनारायण पौडेलका अनुसार वडा कार्यालयले अन्तिम पटक फागुनको १५ गते पत्र लेखेर फागुनको २१ गते भित्र कर नबुझाए उडान रोक्ने बताएको थियो । तर सो निर्देशनलाई नमानेपछि महानगरले प्याराग्लाइडिङ नै बन्द गर्ने भएको हो ।
अहिले उडान गरिरहेका ४० कम्पनी मध्ये एउटा कम्पनीले मात्र कर तिरेको छ । नागरिक उड्ययन प्राधिकरण पोखरामा भने करिब ६० वटा कम्पनीहरुले उडान अनुमति लिएका छन् ।
प्रदेश सरकारले जारी गरेको नीतिअनुसार प्रत्येक कम्पनीले वार्षिक रुपमा पर्यटन करबापत एक लाख २५ हजार रुपैयाँ तिर्नुपर्ने हुन्छ । उक्त कर बापतको रकम वडा कार्यालय वा महानगर कार्यालय मध्य एक ठाउँमा बुझाउनु पर्ने हुन्छ ।
