यातायात समितिहरुले पनि दसैंको अग्रिम टिकट बुकिङ खुलाउने

सरकारसँगको लामो रस्साकसीपछि अन्ततः यातायात समितिहरुले पनि दसैंको अग्रिम टिकट बुकिङ खुलाउने भएका छन् । यातायात व्यवस्था विभागको निर्देशिकाअनुसार कम्पनी प्रालिमा दर्ता भएका यातायात प्रालिहरुले असोज ५ गतेबाट नै अग्रिम टिकट बुकिङ खुलाए पनि समितिअन्तर्गतका टिकट काउन्टरले दसैंको टिकट खुलाएका थिएनन् ।

सरकारलाई भाडादर वृद्धि गराउन समितिका व्यवसायीले बारम्बर दबाब दिँदै आएका थिए । यता प्रालिका काउन्टरहरुले साविककै भाडादरमा टिकट काट्दै आएका थिए । 

शनिबार भौतिक पूर्वाधार तथा यातायात मन्त्रालयमा समितिका व्यवसायी र मन्त्रालयका सचिव मधुसुदन अधिकारीसहितका पदाधिकारीबीच भएको छलफलले आइतबारबाट लागु हुने गरी गाडीको भाडादर वृद्धि गर्ने निष्कर्ष निकालेको थियो ।

यसैअनुसार यातायात व्यवस्था विभागले आइतबार साँझबाट आफ्नो वेबसाइटमा परिमार्जित नयाँ भाडादर सार्वजनिक गरेको छ । “विभागले भाडा सार्वजनिक गरे पनि हामीलाई विभागले भाडा बढाएको आधिकारिक पत्र नदिएकाले आज (सोमबार) महासंघका साथीहरुबीच हामीले छलफल गर्यौं,” नेपाल यातायात व्यवसायी राष्ट्रिय महासंघका महासचिव सरोज सिटौलाले  भने, “हाम्रो आन्तरिक छलफलले भोलि (मंगलबार)बाट अग्रिम टिकट खोल्ने निर्णय गरेकाले भोलि बिहानबाटै दसैंको टिकट खुल्ने छ ।”