भदौ ४,काठमाडौं । नेपाल कम्युनिष्ट पार्टी (ने क पा) को सचिवालय बैठकले कार्यदलको समय थप गरेको छ । कार्यदललाई भदौ ७ गतेसम्म सबै प्रदेशको रिपोर्ट बुझाउन अन्तिमपटक समय थप गरिएको नेकपाका नेता नारायणकाजी श्रेष्ठले जानकारी दिए ।उनका अनुसार अहिलेसम्म कतिपय प्रदेशबाट नाम आउन सकेको छैन भने आएका पनि विवादित अवस्थामा छन् । त्यसैगरी नेकपाले भदौको ८ र ९ गते बोलाएको स्थायी समितिको बैठक भदौ १९ र २० गतेसम्मका लागि सारिएको छ ।

“कतिपय कार्यदलले समयमा रिपोर्ट प्रस्तुत गर्न सकेनन्,” श्रेष्ठले भने, “भदौ सात गतेसम्म बुझाउन निर्देशन दिइएको छ । जहाँ निर्णय भएको छ । त्यहीअनुसार दिने निर्णय हुन सकेको छैन तर ७ गतेसम्म प्रतिवेदन अनिवार्य रुपमा बुझाउन निर्देशन दिइएको छ । स्थायी समितिको बैठक भदौ ८ र ९ भनेका थियौं भदौको १९ र २० गते बस्ने निर्णय गरिएको छ ।”

उनले ७ वटा प्रदेशका कार्यदलले रिपोर्ट दिइनसकेको बताए । “दुई वटाबाट आएकै छैन । कतिपयबाट पूर्ण छैन । १ र २ नम्बर प्रदेशबाट आएको छैन । अरु प्रदेशबाट सामान्य आएको छ तर कतिपय ठाउँबाट प्रस्ताव आएको छ सहमति भएको छैन । जनसंगठनको केहीको बुझाइएको छ धेरैको आउन बाँकी छ ।”