रियल मड्रिडको सहज जित, रोनाल्डोको दुई गोल

 साबिकको बिजेता तथा स्पेनिस क्लब रियल मड्रिडले च्याम्पियन्स लिग फुटबलमा विजय सुरुआत  गरेको छ । बुधबार राति भएको समूह चरणको पहिलो खेलमा साइप्रसको क्लब अपोल निकोसियालाई ३–० ले पराजित गर्दै रियल मड्रिडले विजय सुरुआत गरेको हो ।

घरेलु मैदानमा भएको खेलमा रियल मड्रिडलाई जित दिलाउन स्टार स्ट्राइकर क्रिष्टियानो रोनाल्डोले दुई तथा सर्जियो रामोसले एक गोल गरे । 
जितसँगै समूह एचको रियलले महत्वपूर्ण ३ अंक जोडेको छ । यो समूहमा रियल मड्रिड शीर्ष स्थानमा छ ।

सान्टियागो बर्नाबेउमा भएको खेलमा रोनाल्डोले १२ औं मिनेटमा गोल गर्दै रियल मड्रिडलाई सुरुवाति अग्रता दिलाएका थिए । पहिलो हाफमा १–० ले अघि रहेको रियलले दोस्रो हाफमा थप दुई गोल गर्यो । 

खेलको ५१ औं मिनेटमा रोनाल्डोले पेनाल्टीबाट ब्यतिगत दोस्रो गोल गर्दै घरेलु टोलीको अग्रता दोब्बर बनाए । त्यसपछि खेलको ६१ औं मिनेटम रामोसले गोल गर्दै रियल मड्रिडलाई ३–० को जित दिलाए ।

अपोल निकोसियाविरुद्ध दुई गोलगरेसँगै रोनाल्डो च्याम्पियन्स लिग फुटबलमा घरेलु मैदानमा सबैभन्दा बढी गोल गर्ने खेलाडी बनेका छन् । 

रोनाल्डोले च्याम्पियन्स लिग अन्तर्गत घरेलु मैदानमा भएका खेलमा अहिलेसम्म ५५ गोल गरेका छन् । दोस्रो स्थानमा बार्सिलोनाका लियोनल मेस्सी रहेका छन् । मेस्सीले ५४ गोल गरेका छन् ।
समूह एच  अन्तर्गतकै अर्को खेलमा इंग्लिश क्लब टोटनह्यामले जर्मन क्लब बोरुसिया डर्टमण्डलाई ३–१ ले पराजित गरेको छ  । 

टोटनह्यामलाई जित दिलाउन ह्यारी केनले दुई तथा सन हेङ मिनले एक गोल गरे । डर्टमण्डका एण्ड्री यार्मोलेन्कोले सान्त्वना गोल फर्काए ।  जितपछि टोटनह्यामले पनि ३ अंक जोडेको छ ।