एजेन्सी । अमेरिकी राष्ट्रपति डोनाल्ड ट्रम्पले उत्तर कोरियाली शासक किम जोङको प्रशंसा गरेका छन् । ट्रम्पले किम जोङले गुआम द्वीपमाथि हमला नगर्ने निर्णयलाई ‘समझदारी’ बताउँदै उनको प्रशंसा गरेका हुन् ।

किमको निर्णयले दुई देशबीच त्रास उत्पन्न भएको थियो । तर, किमको हालको निर्णयले उक्त त्रासलाई केही हदसम्म भएपनि कम गराएको सञ्चारमाध्यहरुले उल्लेख गरेका छन् ।

उत्तर कोरियाले खुला रुपमा अमेरिकामाथि हमला गर्नका लागि आफ्नो मिसाइल परियोजनालाई अघि बढाएको थियो । तर अघिल्लो हप्ता ट्रम्पले उत्तर कोरियालाई धम्की दिएका थिए कि यदि अमेरिकामाथि उत्तर कोरयाले हमलाको प्रयास गरेमात्र पनि गम्भीर परिणाम भोग्नुपर्नेछ । उत्तर कोरियाले गुआममाथि हमला गर्ने योजना बनाएपछि ट्रम्पले उक्त धम्की दिएका थिए । तर, बुधबार उत्तर कोरियाको मिडियालाई उधृत गर्दै किमले उक्त योजना हालका लागि रोकेको बताएको थियो ।

जानकारीका अनुसार किमले अमेरिकाको आगामी योजना कस्तो होला भनेर देख्न चाहन्छन् । यसमाथि ट्रम्पले ट्विट गर्दै भने, ‘किम जोङ-उनले निकै समझदारी र तर्कसंगत निर्णय लिएका छन् ।’ उनले भने. ‘कोही अन्य विकल्प दुवै देशका लागि विपत्तिपूर्ण र अस्वीकार्य हुनेछ ।’