तनहुँको व्यास गुफामा धुप बाल्दा आफै बज्छ भजन !

५ साउन,तनहुँ – तनहुँको प्रसिद्ध धार्मिकस्थल पञ्चमन्दिर परिसरमा रहेको व्यास गुफामा भक्तजनले धुप बाल्दा आफै भजन बज्ने भएको छ । व्यास नगरपालिका वडानम्बर ४ का युवा बैज्ञानिक बिकल्प ढुंगानाले धुप बाल्दा भजन बज्ने मेसिन गुफामा जडान गरेपछि यो सुविधा पुगेको हो ।

अगरबत्ती बालेपछि स्वत भजनको धुन बज्न सुरु हुन्छ । ‘ केही गरौ भन्ने लागिरहेको थियो, आफ्नै ठाउँमा उपयोगी काम गरौ भन्ने सोचेर यो प्रयोग गरेको हु’ उनले भने । विकास गरेको प्रबिधिमा अगरबत्ती बालेपछी त्यसको कार्बनडाइ अक्साइडबाट स्वचालित भजन बज्छ यसले गर्दा धार्मिक स्थलहरुमा छुट्टै आकर्षक देखिने उनले बताए । यसअघि युवा बैज्ञानिक ढुंगानाले सोलरबाट चल्ने मोटरसाइकल, हेल्मेट नलगाई र मापसे गरि मोटरसाइकल चलाए स्टार्ट बन्द हुने प्रबिधी भित्र्याएका थिए । सो प्रबिधी ल्याएर लोकप्रिय बनेका बिकल्पले अर्को नयाँ प्रबिधी ल्याएका हुन् । 

युवा बैज्ञानिक ढुंगानाले आफुले विभिन्न प्रबिधीहरु भित्र्याएर नयाँ र रचनात्मक काम गर्न खोजे पनि सबैको साथ र सहयोग नपाएको गुनासो गरेका छन् । काम गरे पनि राज्यको सहयोग नपाएको उनको भनाइ थियो । ४ बेद र १८ पुराणका रचयिता महर्शी वेदव्यास लाई विश्वभर चिनाउने उदेश्य अनुरुप आफै भजन बज्ने प्रविधिको विकास गरेको उनले बताए । उनी २०७२ मा तत्कालिन प्रधानमन्त्री केपि शर्मा ओलि बाट युवा प्रतिभा पुरस्कार बाट सम्मानित भइसकेका छन् ।