मधेशी मोर्चा पनि चुनावमा आउँछ : कमल थापा

बैशाख ९, बिराटनगर– राष्ट्रिय प्रजातन्त्र पार्टीका अध्यक्ष एवम् उपप्रधान तथा स्थानीय विकास मन्त्री कमल थापाले मधेशी मोर्चा पनि निर्वाचनमा सहभागी विश्वास व्यक्त गरेका छन् ।

उपप्रधानमन्त्री थापाले मधेशी मोर्चा निर्वाचनमा सहभागी भए दुई चरणमा स्थानीय तहको निर्वाचन गराउन सरकार बाध्य हुने पनि स्पष्ट पारे । शनिवार विराटनगर विमानस्थलमा संचारकर्मीसँग कुरा गर्दै उनले मधेशी मोर्चालाई स्थानीय तहको निर्वाचनमा सहभागी गराउन सरकारले स्थानीय तहको संख्या बढाउने तयारी गरिरहेको पनि उल्लेख गरे ।

उपप्रधानमन्त्री थापाले स्थानीय तहको संख्या बढेपछि एकै चरणमा स्थानीय तहको निर्वाचन सम्पन्न गराउन राजनीतिक दृष्टिले समेत उपयुक्त नहुने धारणा पनि राखे ।

उपप्रधानमन्त्री थापाले राष्ट्रिय सभाको मताधिकार स्थानीय तहका प्रमुख÷उपप्रमुखले गर्न नपाउने मधेशी मोर्चाको सर्त भने राष्ट्रिय प्रजातन्त्र पार्टीलाई मान्य नहुने पनि स्पष्ट पारे । उनले मधेशी मोर्चालाई स्थानीय तहको निर्वाचनमा सहभागी गराउने विषयमा प्रमुख प्रतिपक्ष एमालेको पनि सहमति लिनुपर्नेमा पनि जोड दिए ।

उपप्रधानमन्त्री थापा सरकारले सबै दललाई समेटेर स्थानीय तहको निर्वाचन सम्पन्न गर्ने कामलाई उच्च प्राथमिकता दिएको पनि बताए ।