ओलीको अपिल: राष्ट्रको पक्षमा स्पष्ट निर्णय लिन मतदातालाई आग्रह

काठमाडौं, फागुन १७ — केपी शर्मा ओलीले मतदातालाई देशको पक्षमा स्पष्ट निर्णय लिन आग्रह गरेका छन्।नेपाल कम्युनिष्ट पार्टी  (एमाले) का अध्यक्ष एवं पूर्वप्रधानमन्त्री ओलीले भिडियो सन्देशमार्फत् राष्ट्रको पक्ष र विपक्षबीच स्पष्ट कित्ताकाट गर्ने समय आएको बताएका हुन्।

उनले मतदातालाई निर्माण र विध्वंसको बाटोमध्ये एक रोज्नुपर्ने अवस्था आएको उल्लेख गर्दै राष्ट्र जोगाउने पक्षमा उभिन आग्रह गरे। यतिबेला आफ्नो धारणा स्पष्ट पारेर बोल्न नसके इतिहासप्रति जवाफदेही हुनुपर्ने अवस्था आउने उनको भनाइ थियो।ओलीले निर्वाचित सरकारलाई अपदस्थ गराउन प्रतिनिधिसभा विघटन गरिएको आरोप लगाउँदै देश जोगाउने कि नजोगाउने भन्ने प्रश्नको उत्तर दिनुपर्ने समय आएको बताए।

देशमा विभिन्न भ्रम फैलाइएको उल्लेख गर्दै उनले आफूविरुद्ध गुनासा र प्रश्न उठेको तथा केही कमजोरी रहेको स्वीकार गरे। तर राष्ट्रिय अखण्डता, स्वाभिमान र सार्वभौमिकताका विषयमा कहिल्यै सम्झौता नगरेको दाबी गरे।उनले संविधान, कानुन, भूमि, जनता तथा सार्वजनिक सम्पत्तिको संरक्षणलाई ‘देश पहिले’ भन्ने अवधारणासँग जोड्दै राज्यका संरचना र सार्वजनिक सम्पत्ति जोगाउन सबै एकजुट हुनुपर्ने बताए।राष्ट्रिय स्वाधीनता र स्वाभिमानलाई प्राथमिकता दिनुपर्ने उल्लेख गर्दै ओलीले आफ्नो माटो, सीमा र पहिचानप्रति गर्व गर्ने भावना नै आत्मबलको स्रोत भएको बताए।