प्रधानमन्त्री कार्की र भारतीय प्रधानमन्त्री मोदीबीच वार्ता

काठमाडौँ, असोज २ गते । नेपालकी नवनियुक्त प्रधानमन्त्री सुशीला कार्की र भारतका प्रधानमन्त्री नरेन्द्र मोदीबीच आज  दूरभाष (फोनवार्ता) वार्ता भएको छ। वार्ताका क्रममा प्रधानमन्त्री कार्कीले भारतीय प्रधानमन्त्री मोदीलाई उहाँको ७५औँ जन्मदिनको अवसरमा शुभकामना व्यक्त गर्नुभएको परराष्ट्र मन्त्रालयले जनाएको छ। सो अवसरमा प्रधानमन्त्री कार्कीले नेपाल–भारतबीचको ऐतिहासिक, सदियौँ पुरानो र मैत्रीपूर्ण सम्बन्धको स्मरण गर्दै दुई देशबीच आपसी विश्वास र सहयोग अझ सुदृढ हुने विश्वास व्यक्त गर्नुभयो। उहाँले नेपालको पछिल्लो राजनीतिक परिदृश्यबारे पनि जानकारी गराउनुभएको थियो।

त्यसैगरी, भारतीय प्रधानमन्त्री मोदीले नेपालकी नवनियुक्त प्रधानमन्त्रीलाई बधाई दिँदै आगामी दिनमा पनि असल छिमेकीका नाताले भारतले नेपाललाई निरन्तर सहयोग गर्ने आश्वासन दिनुभयो।

दुवै मुलुकका सरकार प्रमुखबीच भएको वार्तामा नेपाल–भारत सम्बन्ध, द्विपक्षीय हितका विषय र साझा चासोलगायतका मुद्दामा छलफल भएको परराष्ट्र मन्त्रालयले जनाएको छ।