वाईसीएलका पाँच पूर्व उपाध्यक्ष माओवादी केन्द्रको वैकल्पिक केन्द्रीय सदस्यमा नियुक्त

काठमाडौं, साउन २३ – नेकपा (माओवादी केन्द्र) ले युवा संगठन वाईसीएलबाट बिदा भएका पाँच पूर्व उपाध्यक्षलाई पार्टीको वैकल्पिक केन्द्रीय सदस्यको जिम्मेवारी दिएको छ।

हालै सम्पन्न स्थायी कमिटी बैठकको निर्णयअनुसार गोमनबहादुर मल्ल, केहर कुँवर, उमेश घोरासैनी, मञ्जु बम र सुदीप ढुंगानालाई वैकल्पिक केन्द्रीय सदस्य बनाउने निर्णय गरिएको पार्टी स्रोतले जानकारी दिएको छ। सो निर्णयको औपचारिक सर्कुलर सम्बन्धित निकायहरूमा पठाइएको छ।

त्यस्तै, माओवादीले विद्यार्थी मोर्चाका निवर्तमान पदाधिकारीमध्ये यसअघि केन्द्रीय प्रतिनिधिमा नियुक्त भएका नेताहरूलाई यथावत राख्ने निर्णय पनि गरेको छ।

अन्य निवर्तमान विद्यार्थी नेताहरूको हकमा भने तात्कालीन विद्यार्थीसम्बन्धी कार्यदलको सिफारिस अनुसार प्रदेश सचिवालय समितिमा सिफारिस भएकाहरूलाई सोही रूपमा प्रदेश समितिमा कायम राखिने बताइएको छ।

यस्तै, प्रदेश समितिमा सिफारिस भएका अन्य सदस्यहरूलाई प्रदेश प्रतिनिधिका रूपमा जिम्मेवारी दिने निर्णय गरिएको छ।