प्रधानमन्त्री दाहालले यो निर्णयले आध्यात्मिक चिन्तनको महत्त्वलाई स्थापित गर्न गुणात्मक र दीर्घकालीन भूमिका खेल्ने विश्वास व्यक्त गरे । नेपालका पुराना सहर र भवनको निर्माणमा पनि योगको ज्ञान, विज्ञान एवं वास्तु इन्जिनियरिङको प्रयोग भएको पाइने उनले बताए ।

प्राकृतिक वातावरणको हिसाबले पनि नेपाल संसारभरका मानिसका लागि योग अभ्यासका लागि एउटा सुन्दर भूमि रहेको प्रधानमन्त्री दाहालको भनाइ छ । नेपाल योगसम्बन्धी ज्ञान विज्ञानको अध्ययन गरिरहेका विश्वभरका अध्येताहरूका लागि नेपाल मूल गन्तव्य बन्नसक्ने प्रचुर सम्भावना रहेको उनले बताए ।

प्रधानमन्त्री दाहालले योगमाया आयुर्वेद विश्वविद्यालयले भविष्यमा विश्वस्तरीय विश्वविद्यालयका रूपमा आफूलाई स्थापित गर्दै यस क्षेत्रमा प्राज्ञिक नेतृत्व गर्ने विश्वास व्यक्त गरे । योग शारीरिक अभ्यासमात्रै नभइ निश्चित नियम, विधि र प्रक्रियामा रही अपनाउने वैज्ञानिक जीवनशैली र जीवनपद्धति भएको उनको भनाइ छ ।

अन्तर्राष्ट्रिय योग दिवसको अवसरमा उक्त कार्यक्रमका अतिथि तथा पातञ्जल योग समिति नेपालका अध्यक्ष बालमुकुन्द सुवालले सम्पूर्ण योग संस्थाहरुको तर्फबाट सम्बोधन गर्नुभयो । सम्बोधनका क्रममा उहाँले नेपालमा योगको सुरुवात गर्ने योगी तथा ऋषीमुनिहरुको चर्चा गर्दै शिबसभ्यता, बुद्धसभ्यता, जनकसभ्यताको र पातञ्जल ऋषि लगायत अन्य योगीहरुको योगदानको चर्चा गर्दै हालसम्म आउदा विश्वले समेत योग बिज्ञानको सवालमा नेपालबाट पाठ सिकेको र यो महान बिधा संसारभर फैलिरहेको सन्दर्भमा हामी योगिहरुका सन्ततीको काँधमा यो शिक्षाको अझै व्यापक पार्न र विश्वमा शान्ति र अमनचयन कायम गर्न अहं रहेको बताउनु भयो ।
कार्यक्रमका अध्यक्ष तथा शिक्षा, विज्ञान तथा प्रविधि मन्त्री अशोक कुमार राईले सरकारले नेपालमा योग शिक्षालाई महत्वका सार लिएर स्कुल देखि विश्वविधालयस्तरसम्म यसको पहुँचमा ध्यान दिएको र यसको प्रर्वधनका लागि अझै आवश्यक सहयोग गर्ने वताउनु भयो र कार्यक्रम सफल पार्न सहयोग गर्ने सवैलाई धन्देवाद व्यक्त गर्नु भयो । कार्यक्रममा स्कुलको तर्फबाट बागमती वोडिङ्गका योग शिक्षाका विधाथीहरु, पातञ्जल योग प्रतिष्ठानका योग प्रशिक्षकहरु र त्रिभुवन विश्वविधालयका योग प्रशिक्षाथीहरुबाट आकर्षक योग आसनहरुको प्रस्तुती भएको थियो र ब्रम्हकुमारी योगका तर्फबाट बहिनीज्यूबाट सवैलाई ध्यानका अभ्यास गराईएको थियो ।