यो देशको लागि बलिदान हुन अहिले पनि तयार छु,अध्यक्ष ओली

७ असोज,काठमाडौं।
नेकपा एमालेका अध्यक्ष केपी शर्मा ओलीले यो देशको लागि बलिदान हुन अहिले पनि तयार रहेको बताउनुभएको छ। आज युवा संघ नेपालको राष्ट्रिय प्रचार भेलालाई संबोधन गर्दै ओलीले यस्तो बताउनुभएको हो।

अधिनायकवादका विरुद्ध लड्नका लागि आफूसँग युवा जोश रहेको बताउंदै ओलीले भन्नुभयो ‘एक–दुईजनालाई लहड चल्यो भनेर कानून मिचेर चल्न पाईदैन। उनीहरूका यस्ता क्रियाकलापको विरुद्ध हामी नबोल्ने हो भने को बोल्छ ? त्यस कारण कडा प्रहारको जरुरी रहेको छ । अधिनायकवादी, तानाशाही व्यवहार सरकारले देखाउँछ भने, गठबन्धनको धम्की देखाउँछ भने जहिलेसुकै लड्न तयार हुनुपर्छ।एमालेबिरुद्ध सामाजिक सन्जाल र मिडियाबाट प्रहार हुंदैछ,त्यसका बिरुद्ध सम्पूर्ण युवाहरू अरिंगाल बनेर जाई लाग्दै प्रतिक्रियावादी हरुको षड्यन्त्र ध्वस्त पार्न जरुरी छ।’

अध्यक्ष ओलीले भन्नुभयो ‘कहिले साइबर सेना, कहिले साइबर सर्कल भन्या सुन्छु । तर न सेना बन्यो न सर्कल बन्यो । अस्ति भर्खर पार्टीका एक जना नेताविरुद्ध धूमधामको आक्रमण भयो । तर, कोही बोल्दै बोलेन । मानिलिऊँ उ एक्लै छ जस्तो अवस्था सिर्जना भयो । कतिपय त आफ्नै साथीहरू पनि विपक्षीको भड्काउमा लागे ।’

अध्यक्ष ओलीले भन्नुभयो,अहिले पनि म भन्छु लोकतन्त्रको रक्षाका लागि लड्नुपर्‍यो भने मेरो उमेर ५० वर्ष अगाडि फर्किन्छ । ५० वर्षअगाडिको बैंश निकालेर अधिनायकवादका विरुद्ध लड्न तयार छु । जस्तासुकै परिस्थितिको सामना गर्न तयार छु । यो देशको लागि बलिदान हुन अहिले पनि तयार छु ।’