मधेसले सच्यायो राजपत्रको निशान छापमा भएको त्रुटि

मधेश प्रदेशले स्थायी नाम र राजधानी तोकेको सूचना जारी गरेको राजपत्रमा नेपालको पुरानै नक्सा प्रयोग भएकोमा नयाँ सूचना निकालेर त्रुटि सच्याएको छ।

माघ ३ गते प्रदेशले नाम मधेश र राजधानी जनकपुरधाम प्रदेशसभाबाट तोकेको थियो।

उक्त जानकारी राजपत्रमा माघ ३ मै प्रकाशित थियो।

राजपत्रमा पुरानै नक्सा परेपछि मधेश प्रदेश सरकारको आलोचना भएको थियो। उक्त आलोचनापछि आज प्रदेश सरकारले त्रुटि सच्याएको छ।

सरकारका मुख्य न्यायाधीवक्ता दीपेन्द्र झाले भुलवश हुन गएको प्राविधिक त्रुटि सच्याइएको बताएका छन्।

राजपत्रमा नयाँ नक्सासहितको निशान छाप राखेर नयाँ सूचना छापिएको हो।

यसअघि प्रदेशका आन्तरिक मामिला तथा सञ्चार मन्त्री भरतप्रसाद साहले भुलवश पुरानो नक्सा पर्न गएकोले सच्याउने बताएका थिए।

राजपत्रमा पहिले छापिएको सूचनामा लिम्पियाधुरा, लिपुलेक र कालापानी नभएको निशान छाप उल्लेख थियो। अहिले यी भूमि समेटिएको नक्सा भएको निशान छाप सहित राजपत्रमा सूचना निकालिएको छ।