महानगरीय अपराध महाशाखाका प्रमुख प्रहरी बरिष्ठ उपरीक्षक दिपक थापाका अनुसार रामेछाप सोनापती गाउँपालिकामा स्थायी घर भई हाल भक्तपुर चाँगुनारायण वडा नं. ८ सुडाल बस्ने योञ्जनको पसलमा आएका दुई जना अपरिचित व्यक्तिले बियर सेवन गरी आफन्तलाई जग्गा चाहिएको बताएका थिए ।

जग्गा हेर्ने बहाना बनाई चन्द्रबहादुर योञ्जनलाई एक किलोमिटर टाढा विडोल फाँटको धान खेतमा लगी कुटपिट गरेर योञ्जनको साथमा रहेको सुनको ब्रास्लेट, मोबाइल लुटेर फरार भएका थिए ।

असोज २१ गते कुटपिटबाट घाइते योञ्जनको २२ गते बिहान ग्रिनसिटी अस्पतालमा मृत्यु भएको थियो ।

मरणासन्न हुनेगरी कुटपिट गरी फरार रहेका सिन्धुपाल्चोक बाह्रबिसे नगरपालिका २ घर भई हाल काठमाडौं थली बस्ने ३७ वर्षीय शेर्पा भन्ने कामी लामा, सिन्धुपाल्चोक चौतारा घर भई काठमाडौं बौद्ध बस्ने २३ वर्षीय रमेश तामाङ (ज्वाला तामाङ) र रामेछाप धोवीखोला घर भई बौद्ध बस्ने प्रेम तामाङलाई विभिन्न ठाउँबाट महाशाखाको टोलीले पक्राउ गरेको हो ।

महाशाखाका प्रवक्ता ईश्वर कार्कीका अनुसार मृतक चन्द्रबहादुरसँग शेर्पा भन्ने कामी तामाङले रकम लिनुपर्नेमा रकम दिन आनाकानी गरेका कारण कुटपिट गरेर रकम असुल्ने योजना अनुसार घटना घटाईको अनुसन्धानका क्रममा देखिएको छ ।

शेर्पाले रकम असुल्नको लागि रमेश तामाङलाई बोलाई योजना बनाई असोज २१ गते रमेश तामाङ र प्रेम तामाङ मृतकको पसलमा गएका थिए । १८ गते शेर्पाकै उपस्थितिमा योजना बनाएर योञ्जनको पसलको पहिचान गरेर २१ गते घटना घटाइएको थियो ।

बा ९६ प ७११४ नम्बरको बजाज पल्सर मोटरसाइकलमा अभियुक्त गएका थिए । अभियुक्तले कुनै प्रमाण नछोडेकाले पक्राउ गर्न कठिनाई भएपनि महाशाखाले घटनालाई अत्यन्तै गम्भिरताकासाथ लिएर हप्ता दिन लिएर हप्तादिनको मेहनतपछि पक्राउ गर्न सफलता प्राप्त गरेको हो ।

महाशाखाका प्रमुख दिपक थापाका अनुसार अनुसन्धानका लागि प्रहरी नायब उपरीक्षक निसान थापाको कमाण्डमा पन्ध्र प्रहरी परिचालन गरिएको थियो ।

प्रहरी निरीक्षक एक, प्रहरी नायब निरीक्षक आठ जना, प्रहरी सहायक निरीक्षक एक जना, हवल्दार एक जना र जवान दुई जना अभियुक्तलाई पहिचान गर्न र पक्राउ गर्न खटाईएको थियो ।

अत्यन्तै उत्कृष्ट कार्य गरेको भन्दै  प्रहरीलाई  पुरस्कृत गरिएको कुरा पनि बरिष्ठ उपरीक्षक थापाले बताए ।

अभियुक्तबाट प्रहरीले घटनामा प्रयोग भएको बा ९६ प ७११४ पल्सर मोटरसाइकल मोबाइल फोन सुन बिक्रिबाट प्राप्त १ लाख ५५ हजार मध्ये ५४ हजार ६ सय, रक्स लेखिएको हेलमेट र गालेको सुन १ तोला २ लाल बरामद गरेको छ ।

हेलमेटमा रक्स लेखिएको पत्ता लगाई महाशाखाले यो अप्रेशनलाई रक्स नाम दिई सफल अनुसन्धान गरेको छ ।

यो अप्रेशनको सफलतालाई हेर्दा प्रहरीले चाहाँदा जतिसुकै अप्ठ्यारा घटनालाई पनि अनुसन्धान गरी अभियुक्तलाई कानुनको कठघरामा उभ्याउन सक्छ भन्ने प्रमाण भएको छ ।