गीतालाई आध्यात्मिक दृष्टिकोणले मात्रै हेरियो भने अन्याय हुन्छ

आज पशुपति क्षेत्रमा श्रीगीता जयन्ती महोत्सव कार्यक्रममा बोल्दै मन्त्री भट्टराईले भागवत गीतालाई आध्यात्मिक दृष्टिकोणले मात्रै हेर्न नहुने समेत बताउँदै भने–‘गीतालाई आध्यात्मिक दृष्टिकोणले मात्रै हेरियो भने अन्याय पर्न जान्छ । गीतालाई बहुआयामिक दृष्टिकोणबाट हेरिनुपर्छ र बृहद् क्षेत्रबाट हेरिनुपर्छ ।’  

मन्त्री भट्टराईले पर्यटन भ्रमण वर्ष मनाईरहँदा सास्कृतिक पर्यटनबाट भिजन २०२० को लक्ष्य कसरी हासिल गर्न सकिन्छ सरकारले काम गरिरहेको बताउँदै सबैले सरकारको अभियानमा सहयोग गर्नुपर्ने बताए । उनले पशुपति क्षेत्रको बृहत्तर विकासका लागि सरकार लागि परेको समेत बताउँदै धार्मिक क्षेत्रलाई ब्यापारको थलो बनाउन नहुने समेत जिकिर गरे । 

पशुपति क्षेत्रभित्र भारत सरकारले निर्माण गरिदिएको आधुनिक धर्मशालालाई ३ तारे होटलको रुपमा प्रयोग गरिन थालेको सन्दर्भमा प्रदेश ३ का सांसद नरोत्तम बैद्यले बोलेको कुरालाई लक्षित गर्दै पशुपति क्षेत्र पुरातात्विक क्षेत्र समेत रहेकोले गलत नियतले काम गर्न नहुने बताए । ‘सरकार पशुपतिनाथको पवित्रतालाई जोगाउन र अगाडी बढाउन प्रतिबद्ध छ, पशुपतिनाथ पुरातात्विक क्षेत्र भएकोले कसैलेपनि गलत नियतले काम गर्नुहुन्न । राजनीति गरिनु हुन्न ।’ पशुपति विकास कोषका कार्यकारी अध्यक्ष समेत रहेका मन्त्री भट्टराईले बताए ।  

उनले २०७२ सालको भूकम्पबाट क्षती भएका पुरातात्विक सम्पदाहरुको पुर्ननिर्माण आगामी दुई वर्ष भित्र पुरा गर्ने सरकारको लक्ष्य रहेको पनि बताए । यसका लागि विदेशी दातृ राष्ट्रहरु विषेशगरी भारत सरकारसँगको सहकार्यमा काम भइरहेको मन्त्री भट्टराईले बताए ।  

कार्यक्रममा बोल्दै नेपालका लागि भारतीय राजदुत मंजिब सिंह पूरीले गीता धर्ममात्र नभएर मानव जीवनमै अर्थ राख्ने बताउँदै सबैले गीताको उपदेशलाई ब्यवहारका लागू गर्नुपर्ने बताए । उनले नेपाल–भारतको सम्बन्ध कहिल्लै नटुट्ने विस्वास दिलाउँदै पशुपति क्षेत्रको बृहत्तर विकास र बागमती सरसफाई र सिचाईका लागि भारत सरकारले यस अघि गरेको प्रतिबद्धता पुरा गर्ने जनाए ।  

पशुपतिनाथका मूल भट्ट गणेश रावल, ३ नं. प्रदेशका सांसद नरोत्तम बैद्य, पशुपति क्षेत्र विकास कोषका सदस्य सचिव प्रदीप ढकाल लगायतले बोलेका थिए ।  

गीता जयन्तिको अवसरमा आयोजित कार्यक्रममा विहान ९ बजे पशुपति स्थित माधवराज सुमार्गी स्मृति भवनमा उपत्यका भित्रका विद्यालयका विद्यार्थीहरुले गीताको ११ औं अध्याय पाठ गरेका थिए । भने ११ बजेदेखि गीता साधक, गुरुकुल र सर्वसाधारणले समेत गीताको १ अध्याय देखि १८ अध्यायसम्म स्वाध्याय गरेका थिए ।  

कार्यक्रममा सहभागी उत्कृष्ठ विद्यालयलाई पुरस्कृत गरिएको थियो । विद्यार्थीलाई प्रशंशापत्र वितरण गरिएको थियो । गीता प्रेस गोखरपुरको आयोजनामा भएको कार्यक्रमको सभापतित्व गीता प्रेस गोरखपुरका ट्रष्टी विष्णुप्रसाद चाँदगोठियाले गरेका थिए ।