काठमाडौं, १२ मंसिर । अस्पतालमा उपचाररत प्रधानमन्त्री केपी शर्मा ओलीलाई भेट्न राष्ट्रपति विद्यादेवी भण्डारी अस्पताल पुगेकी छिन् । राष्ट्रपति भण्डारी अस्पताल नै पुगेर प्रधानमन्त्रीको स्वास्थ्य अवस्थाबारे जानकारी लिएकी हुन् ।
राष्ट्रपति भण्डारीले प्रधानमन्त्री ओलीसँग करिब १५ मिनेट कुराकानी गरेकी अस्पतालका एक कर्मचारीले जानकारी दिए । प्रम ओली एपेन्डिसाइटिसको शल्यक्रिया गराएर चिकित्सकको निगरानीमा अस्पतालमा स्वास्थ्य लाभ गरिरहेका छन् ।
उनको स्वास्थ्य अवस्था बुझ्न राष्ट्रपति भण्डारी बिहीबार साँझ शिक्षण अस्पताल चिकित्सकसँग ब्रिफिङ पनि लिएकी छिन् । शिक्षण परिसरमा रहेको मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा पुगेकी राष्ट्रपति भण्डारीलाई प्रधानमन्त्रीको उपचारमा संलग्न चिकित्सकहरूले प्रधानमन्त्रीको अवस्थाका बारेमा २० मिनेट ब्रिफिङ गरेका हुन् ।
राष्ट्रपति भण्डारीले अस्पतालमा करिब ३५ मिनेट बिताइन् । यसअघि कुनै पनि भिआइपीले प्रधानमन्त्रीलाई भेट्न पाएका थिएनन् ।
प्रधानमन्त्रीका प्रेस सल्लाहकार सूर्य थापाले राष्ट्रपति भण्डारीले प्रधानमन्त्री ओलीसँग भेट गर्न अस्पताल पुगेको तस्बिर सार्वजनिक गरेका छन् ।
